MUSICHE. Carniarmonie: trente agns di musiche

Une rassegne storiche ma simpri plui zovine
sot la direzion di Claudio Mansutti
Al jere il 1991 cuant che al è tacât il festival musicâl de Cjargne Carniarmonie. Si fasevin cuatri, cinc concierts, no di plui, e tes primis edizions il public nol jere – a dile dute – cetant numerôs. Cumò a son passâts trente agns, e di concierts in cartelon in cheste edizion festezade a son ben 54, dai 15 di Lui ai 5 di Setembar, in mancul di doi mês! E al è simpri plen di int, ancje se la pandemie e à limitât lis presincis. Un “crescendo”, come che si dîs tal cjamp de musiche, o ben un cressi salt che di volte in volte al à puartât Carniarmonie a organizâ datis cun artiscj impuartants, dal teritori e dal forest, no dome in Cjargne ma ancje in Val Cjanâl e Cjanâl dal Fier, e chest an un apontament al è ancje in Austrie, a Dellach Im Gailtal, cemût che al è stât tal Lui a pene passât.
◆ Il diretôr artistic Claudio Mansutti, clarinetist furlan di grande nomee in plui che diretôr artistic de Fondazion Luigi Bon di Culugne e sorintendent de FVG Orchestra, nol plate la sodisfazion tal constatâ che aromai Carniarmonie e je jentrade – e di un biel pieç – a plen titul tra lis rassegnis culturâls plui impuartantis e vivarosis de Regjon, di rivâ a cjapâ dentri ducj i comuns de Cjargne e no dome, cun events di grande cualitât e nons di ponte tal panorame de musiche classiche, jazz, di contaminazion, contemporanie.
◆ «Chest an – nus conte Mansutti – pai trente agns di Carniarmonie o vin volût fâ nô un regâl ae manifestazion, fasintle deventâ “Il Festival dai Festivals”. Parcè che, in particolâr in cheste edizion, a son cetantis lis iniziativis di musiche e di culture organizadis di bande di altris realtâts e che nô o promovìn cun grant plasê. Dentri di Carniarmonie, di fat, o vin datis dal Festival Anciuti di Fors Disore, dal Saxophon Festival di Pontêbe, La lungje gnot des plêfs in Cjargne, apontaments dal Ent Regjonâl Teatrâl, de Mozartine di Paulâr, de FVG Orchestra cun “Accordi Musicali”, l’incubadôr di musiche e artesanât “La musiche dal len”, events di Risonanze Festival di Malborghet Valbrune, il Cjamin Celest che al cjape dentri dut il Friûl, la Mostre di Dieç e vie indenant. Tantis, ma tantis bielis robis, di vignî sù a viodi e a scoltâ».
Dificil rivâ adore di fâ un struc dai plui di cincuante concierts di cheste edizion 2021, e di fat nancje no provìn. Il sît internet carniarmonie.it al conte e al spieghe dut cun grande precision.
O tignìn invezit a ricuardâ i lûcs indulà che si fasin i concierts: lis plêfs antighis de Cjargne, lis grandis glesiis tant che i domos, lis abaziis come chê di Mueç, lis bielis gleseutis di tantis frazions, i museus, tant che chel Cjargnel di Tumieç, il pôl di Rabil, i teatris e lis salis polifunzionâls. Ma ancje lûcs tal viert, come i prâts sot de Mont Mariane, Malghe Pure a Dimpeç, Malghe Saisare a Malborghet, lis placis, tant che a Pontebe, Tarvis e Tumieç, o il sît archeologjic dal forum roman di Zui.
◆ Trente agns di storie, no dome musicâl ma ancje di chê vere di Cjargne, cu la sô int e i turiscj che ogni Istât a spietin e si incuintrin in cheste grande famee che il festival de mont cjargnele al à metût adun cun grant impegn e costance, cu la volontât di garantî une ufierte culturâl sul teritori in sinergjie cu lis realtâts locâls, lis associazions, lis pro loco, lis parochiis, i comuns, i artiscj e dute la int ospite. Se inmò no tu âs vût la ocasion, in trente agns, di partecipâ a un apontament di Carniarmonie, chest an no tu âs scusis. Al vûl lât a viodi e scoltât! ❚