Une vendeme cooperative te suaze de sostignibilitât

Dutis lis cantinis cooperativis regjonâls
a àn aderît al Sisteme Nazionâl di Produzion Integrade. De prossime racuelte,
a saran plui di 3.000 i etars certificâts
La ue di buine part de vendeme 2021 di dutis lis cantinis cooperativis dal F-VJ, e sarà sostignibile e certificade. Di fat, la cantine Viticultôrs Furlans La Delizia (di Cjasarse), la Cantine produtôrs Ramussiel e Sant Vît, la Cantine produtôrs Cormons, la cantine Vins San Zorç (di Sant Zorç de Richinvelde) e la Cantine Raussêt, a àn aderît al scheme di certificazion – gjestît dal Ministeri des Politichis agriculis agroalimentârs – SQNPI (Sisteme di Cualitât Nazionâl Produzion Integrade) che al permetarà, a cui che lu volarà, di aplicâ su la etichete il simpatic e cognossût logo de “avute” su fonts blanc e contor vert.
◆ Une adesion fisse dai socis, coordenade in maniere convinte dai dirigjents, che a metin la regjon enoiche cooperative dal Friûl-VJ ai vertiçs nazionâi, dulà che il 51 par cent des cooperativis al à aderît za a un standard di certificazion volontarie (SQNPI in primis, ma ancje Equalitas e Viva).
A son 350 i socis produtôrs coinvolts par une superficie di vignâl di plui di 3.000 etars, intun contest dulà che la cooperazion vitivinicule e racuei e e vinifiche plui dal 40 par cent di dute la produzion regjonâl di ue, cuntun faturât complessîf che al passe i 85 milions di euros.
◆ La SQNPI e je une certificazion che e interesse ducj chei prodots agricui e agroalimentârs otignûts cun filieris di produzion integrade. Si realize midiant di tecnichis specifichis par ogni culture e indicazions fitosanitariis vincolantis, che a cjapin dentri sedi pratichis agronomichis che limitazions intal numar e inte sielte dai prodots doprâts dilunc dai trataments segnâts dentri di une liste positive aprovade ancje dai tecnics de Regjon Friûl-VJ, tant che previodût de normative specifiche.
◆ «O ricuardìn che il fin dal scheme di certificazion al è chel di misurâ la prestazion ambientâl e sociâl des impresis, come pûr i risultâts economics. Al è un standard certificât di un ent tierç (Ceviq) e che al domande aes aziendis di rispietâ altis prestazions di sostignibilitât sociâl e ambientâl e di rindi trasparents in maniere publiche i ponts otignûts – al marche Venanzio Francescutti, president di FedAgriPesca F-VJ –. Lis nestris cooperativis a son ben cussientis dai tancj vantaçs competitîfs che a vegnin dal otignî i standards di certificazion volontaris: di là de incressite tendenziâl dai volums vendûts e dal valôr, si evidenzie un “plus valoriâl” assegnât soredut dai acuirents forescj; cun di plui, al è un indicadôr di une fuarte coesion e cussience tra i sogjets aderents sul teme impressindibil de tutele ambientâl».
◆ E al è za cui che al cjale bande il biologjic, cemût che e je daûr a fâ la Cantine Raussêt (partint de culture di vîts resistentis aes fitopatiis principâls) e la Cantine Ramussiel e Sant Vît. ❚