Dôs sûrs inamoradis dal Tiliment

Ancje a miârs di chilometris di distance, Anna Scaini no si è dismenteade dal “so” Tiliment. Di cualchi timp, di fat, e sta puartant indevant studis sul flum cul supuart de Universitât di Stocolm. Lu fâs insiemi cuntune altre ricercjadore cressude, come jê, su lis spuindis de roie di Belgrât: la sûr Chiara, che, daspò di undis agns di lavôr in Spagne, di un pâr e je tornade in Friûl e si ocupe di pericui ambientâi pal Istitût nazionâl di Oceanografie e di Gjeofisiche sperimentâl – Ogs. «Lis competencis di analisi e di gjestion dai pericui naturâi di Chiara si cumbinin ben cu lis mês», e conte Anna.
◆ La inclinazion pe ricercje des dôs sûrs e nas in famee, in gracie di une mame e di un papà apassionâts di storie e siencis naturâls; la idee di fâ un studi sul Tiliment dilunc di une des tantis cjaminadis sul so ôr. «O vin scomençât cuntun studi su articui sientifics e di gjornâi locâi sul Tiliment. I contignûts di chei sientifics, plui o mancul 250, a tocjin pal plui aspiets ecologjics, morfologjics e idraulics; chei de stampe locâl, tancj di plui, a discutin tematichis sociâls, economichis e politichis, che la ricercje sientifiche no considere. Sience e gjornâi no si fevelin avonde».
◆ E cui che al lei chei gjornâi, ce pensial? Ce sintial pal Tiliment? Par capîlu, Anna e Chiara a àn preparât un cuistionari che «al à vût un grant sucès, cun plui di 4 mil rispuestis in pôc plui di un mês, cualchidune e je rivade ancje di emigrants. La analisi dal cuistionari e conferme il grant valôr paisagjistic e ambientâl di dut il flum, e a ‘nt ribat il valôr culturâl e sociâl. Scuasit ducj i partecipants a son convints che il preservânt la naturalitât al vedi di lâ pâr a pâr cu la sô difese e cu la sigurece des comunitâts che a son su lis sôs rivis. Dal pont di viste sientific, o vin confrontât i dâts rigjavâts des opinions cun chei uficiâls des mapis di pericul di diluvions. In complès, i risultâts – pandûts cun articui sientifics a disposizion di ducj – a mostrin un interès fuart par chel che al sucêt sul flum, e un desideri di partecipâ in maniere ative aes sieltis sul so avignî».
◆ Par cheste reson, «o sin daûr a imbastî un cicli di ativitâts che al puartarà, di une bande, a condividi chestis conclusions e, di chê altre, a discuti e comunicâ aspiets impuartants sul flum. Chei che o vin clamât “Dialics estîfs su passât, presint e senaris futûrs sul flum Tiliment” a tacaran ai 25 di Lui li de aziende agricule Ferrin a Cjamin di Codroip; il secont apontament al sarà la dì dopo, te aziende agricule Pitars a S. Martin dal Tiliment». L’auspici di Anna e Chiara Scaini al è chel di rivâ a puartâ un contribût par un futûr dal Friûl che al tegni cont di chel che la int si spiete, e spere, e sint. Fûr di logjichis economichis e politichis. Cussì, par progjetâ buinis strategjiis e pratichis di gjestion dai cors di aghe, «si à di tignî cont dai progrès de ricercje sientifiche, che a van comunicâts ae int e la int e à di podê dî la sô, partecipâ aes decisions dai sorestants, tant che e dîs ancje Agenda 2030, il plan di azion dal Onu pal svilup sostignibil».
◆ Ta cheste otiche, no si pues alore no tignî cont des scuasit 15 mil firmis metudis adun de petizion che e domande la tutele Unesco pal Tiliment: une ocasion preziose di cressite a lunc tiermin, pal flum e pes sôs comunitâts, dal sigûr no compatibile cui progjets di costruzion di un sbarament te strente di Pinçan o de autostrade Çumpiel/Glemone. E nancje cu lis spietis de int.
◆ «Viodudis lis carateristichis dal Tiliment, ecosisteme unic al mont che o sin ducj responsabii, al è clâr che la sô conservazion e cjape dentri il flum inte sô interece, e à di tignî cont dai efiets dal cambiament climatic e di une sô gjestion sostignibile, che a domandin une cognossince aprofondide dal teritori – e marche Anna –. La sô protezion e chê des comunitâts che lu vivin, a son lis dôs musis de stesse medaie». ❚