E puarte indevant ricercjis in dut il mont,
ma “a gno fi la marilenghe je insegni cun braùre”
La passion pai flums e je nassude cuant che e jere frute, sul ôr dal Tiliment. Anna Scaini, ricercjadore in idrologjie te Universitât di Stocolm, intai ultins dîs agns e à lavorât su la gjestion dai cors di aghe, madressint une esperience significative in Spagne, Lussemburc, Svezie, Stâts Unîts e Vietnam. Ma «il gno cûr – e dîs, cuntune vene di malinconie – al è leât al flum de mê infanzie, che o ricuardi libar e incontaminât».
◆ Anna e je cressude a Belgrât di Vildivar, su la spuinde a man çampe dal Tiliment, intun teritori cjantât di poetis e di scritôrs – di Ermes di Colorêt a Ippolito Nievo, di Amedeo Giacomini a Elio Bartolini e Sergio Maldini – pal so paisaç carateristic, di risultive, traviersât dal Var. «Di picinine – si impense –, o restavi incantesemade a cjalâ lis bufulutis che a vignivin sù des olis. Mi domandavi ce che a fossin». A varessin vût di passâ uns pôcs di agns par che lis curiositâts di chê frute a cjatassin une rispueste in gracie di un percors di formazion e di vore che le varès puartade a studiâ la presince e la distribuzion intal spazi e intal timp de aghe, sedi disore che disot de tiere, cjapant dentri lis proprietâts chimichis, biologjichis e fisichis, e la sô interazion cul ambient: elements fondamentâi di cognossi pe gjestion des risorsis idrichis, des plenis e dai secs, pes valutazions sul intosseament dai cuarps idrics.
◆ Vuê Anna e vîf inte isule di Lidingö, tal arcipelac interni di Stocolm, par cualchidun il plui biel de Svezie, a pôcs centenârs di metris dal mâr e cul bosc dongje, cul om statunitens, Jay, ancje lui ricercjadôr, e il piçul Sebastian, che nol sa ancjemò fevelâ, ma al capìs il furlan. Merit di une mame poliglote, che e cjacare ben inglês, francês, spagnûl, in plui che talian e un pôc di svedês, ma che e puarte tal cûr «la lenghe che mi à insegnât la mê cjare none Teresa – il furlan – e che cumò, cun braùre, o insegni a gno fi».
◆ Par cemût che lu descrîf la idrologhe furlane, il Paîs nordeuropean che i da acet dal 2018, al è «un paradîs pes fameis» cuntun welfare une vore gjenerôs, cjalant a maternitât e paternitât ancje par cui che al à, come Anna, un contrat a timp determinât. Tra i tancj beneficis, «i gjenitôrs a puedin domandâ fin a 450 dîs di congjêt; maris e paris a son incoragjâts a dividisi in maniere ecue chest timp. Jo e il gno om lu stin fasint». La Svezie e je ancje un dai Paîs che al invistìs di plui in ricercje e plui progredîts dal pont di viste de paritât di gjenar. Une situazion che Anna e tocje cun man. «No ai mai viodûts tancj mascjos feminiscj tant che achì», e dîs. E sul puest di vore, te universitât, «il gno dipartiment al è vuidât di une femine». E je jê a vê intuît il valôr sientific dal ultin progjet de ricercjadore di Belgrât su cemût che al ven sintût e vivût il Tiliment, in relazion ae percezion dal pericul, acès al flum, oportunitât di svilup pal teritori, identitât e culture, e che al vûl puartâ un contribût concret su la gjestion e sul avignî dal unic cors di aghe alpin ancjemò tal stât naturâl. Une indagjin che Anna e puarte indevant insiemi cu lis ricercjis su la conession tra produzion agricule e cambiaments dal cicli idrologjic, par efiet dal clime che al mude, su flums dai Stâts Unîts e sul delta dal Mekong, in Vietnam. Un impegn che al va inte direzion di rivâ a une agriculture sostignibile, ven a stâi che e dedi di mangjâ a ducj preservant l’ambient.
◆ Dopo tancj agns intal forest, bielis esperiencis personâls e professionâls ator pal mont, il Friûl al reste simpri la cjase, il lûc dai afiets. «O tornarès ancje doman, ma o sai ben che, intal gno cjamp, o varès grues problemis a cjatâ lavôr». Anna, però, no si rint. «Al rivarà il moment che o podarai judâ la mê tiere intal setôr che o cognòs miôr, chel de gjestion sostignibile de sôs aghis, che a son un patrimoni straordenari, di tutelâ prime che al sedi masse tart». ❚
………………………….
IL PROFÎL
Classe 1985, Anna Scaini e je cressude a Belgrât di Vildivar. Diplomade al liceu sientific di Codroip, si è iscrite te facoltât di Agrarie de Universitât dal Friûl, dulà che si è laureade cuntune tesi di idrologjie intal cors di Siencis e tecnologjiis pal ambient e la nature. Tal 2007, la prime esperience intal forest: in Spagne, a Pamplona, pal Erasmus, li che e à studiât il flum Arga.
◆ Subit dopo de lauree magjistrâl te Universitât di Padue, e je tornade in Spagne, a Salamanca, dulà che e à lavorât in zonis agriculis scuasit desertichis intal bacin dal flum Duero. Pal dotorât di ricercje te Universitât di Lancaster, in Ingletiere, e à cjapât in esam il flum Weierbach, in Lussemburc, e il passaç de aghe sot tiere, prime di rivâ al flum.
◆ Dopo di un periodi curt in Italie, intal 2018 e à scomençât un post dotorât al dipartiment di Gjeografie fisiche de Universitât di Stocolm. ❚
A torzeon pal Friûl / “Der Voschank”, il spetacul des mascaris sauranis
Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +
A torzeon pal Friûl / La maravee di scuvierzi il Carnevâl rosean
Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +
A torzeon pal Friûl / Il rituâl de Messe dal Spadon nus ripuarte ae ete dai Patriarcjis
Sara Traunero
La memorie e torne indaûr a Marquart, ma forsit la tradizion e je ancjemò plui antighe Ai 6 di Zenâr, in ocasion de fieste de Epifanie, il Comun di Cividât si prepare a celebrâ un rituâl tant curiôs che inmagant: e je la Messe dal Spadon, che par tradizion si fâs tal antîc Domo antîc. […] lei di plui +
Libris simpri bogns / Emilio Nardini, “Par vivi”, Udin, 1921
Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +
Interviste / Numb il cjan scjaladôr (e il so paron Thomas)
Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +
Int di Cjargne / “La gallinella saggia” che a Cjavaç e insegne a produsi e a mangjâ ben
Marta Vezzi
La aziende agricule biologjiche La Gallinella Saggia e je nassude 7-8 agns indaûr: “La idee e je stade di mê mari – e conte Caterina Pillinini – che e à simpri fat orts e cjamps, e duncje e je une vite che si dediche ae coltivazions di tancj prodots; vint il ristorant Borgo Poscolle e […] lei di plui +