_______________

Ancje i parons a deventin sotans

Scancelâ la storie, i simbui, la rapresentance, e fintremai la stesse idee di Friûl: la tindince che si viôt e je simpri plui clare e frecuente, e un grum di events piçui e grancj tal ultin mês a sclarissin che l’aiar al sta cambiant. In piês. Lu dimostre, par esempli, il cantîr inviât dai Industriâi dal Venit e di chei dal Friûl-Vignesie Julie par lâ viers di une fusion e par fâ nassi la Confindustrie dal Nordest talian. Un pat di açâl par une “politiche di rilanç”, cul obietîf di «scjavaçâ i confins aministratîfs par coneti lis realtâts produtivis che za cumò a lavorin cun filieris interdipendentis e integradis». I doi presidents, Carraro e Bono, a colp a àn sclarît che “no je sigûr une scjalade venite ae associazion furlane”: ma il risi al è. Confindustrie Venit e rapresente 10 mil impresis e 250 mil impleâts cuintri lis 1200 impresis e i 60 mil dipendents di Triest, Gurize e Pordenon, là che Michelangelo Agrusti al à metût in pîts Confindustria Alto Adriatico, entitât che e met tal cjanton la Confindustrie di Udin, no masse convinte di deventâ sotane dai venits e cun di plui inte otiche di un disvilup dut orientât viers dal Puart di Triest.
◆ E je propit vere che no son plui ponts di riferiment. Une volte i parons a comandavin e i sotans a ubidivin, in cambi de protezion che i siôrs ur devin, intant che a viodevin di tutelâ i lôr interès: i sotans a vevin dome di gloti e meti inte sachete ce che a decidevin chei altris. Ma ce sucedial se ancje i parons a deventin sotans? Se il Leon di Vignesie al torne a scjafoiânus, i furlans si spietino che i sorestants ju difindin o che si inzenoglin? Al è chest che al sta capitant intune Regjon dulà che il Friûl al è daûr a deventâ dome une “espression gjeografiche”, nancje masse ben stabilide su chei stes sussidiaris che a vegnin adotâts intes scuelis. Nuie ce maraveâsi: no si sa plui nancje cuale bandiere che i zovins a varessin di doprâ par rifleti la lôr identitât. Pe direzion dai Scouts de Agesci, di fat, la bandiere de Regjon e va ben, la acuile di Beltram invezit e je “divisive”.
◆ La politiche dal turisim e je stade za indreçade viers dal Venit, cu la costituzion di un comprensori promozionâl dal Alt Adriatic; Finest e je za in man ai venits; Autovie ancje; la Agjenzie venite dai paiaments pe agriculture e gjestìs i contribûts pal setôr primari; e cumò i “boni et fideli furlani” àno di viodisi gafâ ancje la industrie creade intai agns di impresaris come Marco Fantoni (recuie)?
◆ La “Patrie” e crôt invezit inte braùre di jessi furlans, colaborâ cun ducj ma no vendisi a nissun. E par pandi cheste identitât, e cjatâsi cu la comunitât di letôrs, dai 20 di Lui o sarìn di gnûf ator pai paîs cu “La Patrie sot dal Tei”. O tachìn di Parteulis di Rude, ma o sarìn a torzeon ancje dongje di voaltris. Us spietìn, a dînus che ancje voaltris come nô no volês scancelâ il Friûl, ma piturâlu di gnove vite. ❚