INTE SETEMANE DE CULTURE FURLANE. Fieste pai 75 agns de “Patrie”, la “cjase di cjarte” di ducj i furlans, une vôs libare e identitarie

La Setemane de Culture Furlane, inmaneade de Societât Filologjiche, e à screât il sô fis calendari ai 6 di Mai cuntune serade che e à metût dongje une rievocazion dople: chê dai 45 agns dal taramot che intal 1976 al à metût in zenoglon la nestre tiere, ma ancje i 75 agns di un altri moment di chei che a somein fats di pueste  par mostrâ cemût che i furlans a son bogns, intes dificoltâts, di resurî ogni volte che la Storie e mande in cinise dut ce che a àn tirât sù. Si trate de jessude dal prin numar dal nestri gjornâl, “La Patrie dal Friûl” , vôs di un popul che no si rint e che al vûl simpri tornâ a cjapâ in man il so destin dopo che lis disgraciis lu plein. La riviste e vignì fûr tal 1946, intun moment là che e fo buine di deventâ un pont di riferiment par dut il mont autonomist che al sostignive la nassite di une Regjon furlan distacade dal Venit.
◆ Dopo dal Venteni fassist, là che il teritori de otave provincie venite al jere stât ridusût a “Sentinele de Patrie”, a vuere finide e jere saltade fûr cence pôre e cuntun grant morbin une minorance visionarie che e pandeve la convinzion ferme che dome une entitât aministrative autonome e podeve garantî un avignî ae nestre comunitât, che di Cjaurêt incà e veve paiât un presit di no crodi aes ambizions dal nazionalisim talian. In chê minorance a jerin cerviei no di pôc: come chel di Tizian Tessitori, pari de Associazion pe Autonomie, di Pieri Pauli Pasolini, che al veve fondade la Academiuta de Lenga Furlana, e di Zuanfranc D’Aronco, che al fo la anime dal Moviment Popolâr Furlan pe Autonomie. In chel trop di inteletuâi che si meterin dongje sul troi de identitât, e jere ancje la poliedriche figure di pre Josef Marchet, che al inizi dal 1946 al decidè di dâ cuarp a un imprest di comunicazion che a chel moviment i mancjave, e cussì al podè fâ il licôf di cheste “cjase di cjarte” prontade pai furlans, o ben “La Patrie dal Friûl”. E jere (e ancjemò in dì di vuê e continue a jessi) un sfuei indipendent che il predi di Glemone al veve creât insiemi a un altri om di valôr, che come lui al jere stât perseguitât dal Fassio: al jere il dentist Felix Marchi, che cu la femine Maria Del Fabbro (prime femine a direzi un gjornâl in Friûl) al fo la colone dal periodic par cetancj agns.
◆ Marchet e Marchi, il predi e l’anarchic: il ritrat vivarôs di chê strane cubie, scrit di un dai zovins colaboradôrs di chel gjornâl, Lelo Cjanton, e let di Carlotta Del Bianco, al à screade la schirie di testemoneancis che a son ladis in onde in direte streaming sul sît www.setemane.it par tornâ a passâ fûr la storie di une testade che e à fat epoche. Dopo dal salût dal president dal consei regjonâl Pier Mauro Zanin e de analisi dal president de Sff Federico Vicario su la figure di Marchet,  lis variis fasis de vite de riviste a son stadis contadis dai diretôrs che a àn vuidât il periodic intai ultins agns. Fidrì dai Ros (Federico Rossi) al à contade la rinassite di tantis esperiencis culturâls intor de lenghe furlane ae fin dai agns Otante, e po pre Romano Michelot al à let une memorie scrite di pre Toni Beline par memoreâ la sô direzion, une des plui autorevulis che il sfuei al vedi mai vût. Dree Venier al à fat il pont su cemût che intai agns Doi mil, dopo de muart di pre Toni, un trop di zovins colaboradôrs al sedi tornât a stiçâ la riflession sul Friûl di vuê in maniere origjinâl e dinamiche. Su chel troi si è inviade ancje Erika Adami, che e à ricuardât cetant impuartant che al è il contribût des feminis ae realtât furlane, tant che “la Patrie” – e à dit – “e varès di clamâsi Matrie”.
◆ A sierâ la serade, che e à vût un bon sucès di public e tancj coments positîfs di bande dai letôrs e no dome, a son stâts i intervents di Diego Navarria, che al à fevelât de iniziative “La Patrie sot dal tei”, e dal president de Clape culturâl La Patrie dal Friûl Dree Valcic, che al à ricuardât cetant che chest gjornâl al à dât intai agns ae comunitât in tiermins di fuarce identitarie, e trop che la sô vôs e sedi discomude, parcè che e je la cussience critiche di un Friûl che tancj no volaressin scoltâ.
“La Patrie” intai agns ogni tant salacor si è fermade, ma no si è mai pierdude ni smamide: anzit, e à simpri cirût di jessi la cjase di ducj i furlans che a refudin la sotanance e che a volaressin lâ di là des lagnancis, che invezit no coventin a nuie.
◆ La domande che e ven spontanie e je: cuissà ce che a disaressin vuê i fondadôrs de nestre testade? Saressino contents e braurôs o nus patafaressino cun dute la lôr energjie? No je par sigûr cheste la Regjon che lôr a varessin volût, ma cence di lôr la Regjon forsit no sarès nancje nassude. E forsit nol sarès stât cussì fuart nancje il spirt identitari che nus à puartât fûr dal troi de disperazion e de rassegnazion dulà che il taramot al podeve menânus, cuant che buine part de nestre int si è cjatade di bot cence un cuviert sul cjâf e tal mieç di un mont ridusût in maseriis. La lezion di 75 e di 45 agns indaûr nus mostre che se intune comunitât a son cussience e vision, ogni rinassite e je pussibile. E in timps di ripartence dopo di une pandemie che chenti e à fat lis vitimis di trê taramots, chest messaç al è insiemi un sproc fuart e ancje un segn di sperance, par dâ forme a une gnove ricostruzion che e vedi lidrîs fondis par fâ cressi il Friûl di doman, che no si dismentei di ce che al è stât îr.  ❚