Un bant par judâ cui che al jude

La Fondazione Friuli e à di pôc publicât il bant “Welfare 2021” che al permetarà aes realtâts dal teritori furlan di presentâ lis domandis di contribût dentri dai 18 di Fevrâr pai progjets indreçâts aes personis no autosuficientis, ai minôrs in cundizion di disasi, aes personis cun disabilitât psicofisiche, e ancje par intervents inovatîfs pal sostegn de domiciliaritât midiant di sistemis di telemonitorament e teleassistence. Il bant al repliche il model dal an passât e al intint dâ continuitât al model di sostegn intun moment une vore dificil come chest. Viodude la situazion, la Fondazione Friuli e à volût semplificâ lis proceduris pe presentazion des domandis. «O volìn dâ rispuestis rapidis e funzionantis – al à dit il president de Fondazione Giuseppe Morandini – : salût publiche e medisine preventive a son lis areis prioritariis di intervent di frontâ, cirint di une bande di furnî rispuestis aes bisugnis plui urgjentis, e di chê altre di insisti su progjets sperimentâi par inovâ il sisteme di welfare». Ancje cheste edizion dal bant Welfare e gjolt dal contribût dal grup bancjari Sanpaolo e de colaborazion de Regjon, in particolâr de direzion de sanitât des singulis aziendis sanitariis: «Fâ zûc di scuadre – al à dit l’assessôr regjonâl Riccardo Riccardi – al vûl dî meti in cjamp dutis lis risorsis e lis competencis che nus permetin di combati insiemi e di superâ cheste situazion storiche. Se di une bande il public al sta doprant dutis lis risorsis pussibilis par frontâ la pandemie, al è impuartant che ancje lis istituzions privadis a dedin il lôr supuart. La Fondazione Friuli e à la poie plene de Regjon, inmò di plui cuant si cjale i destinataris des iniziativis sostignudis, tant che  anzians no autosuficients e minôrs cun problematichis psicofisichis». «O vin tornât a confermâ – al dîs Renzo Simonato, diretôr di Intesa San Paolo pal Nordest – la nestre poie ae Fondazione e o condividìn la volontât di proviodi cun intervents mirâts. Fin dal inizi de pandemie, Intesa San Paolo e à ativât misuris imediadis e concretis par frontâ lis emergjencis economichis e sanitariis dal paîs, ancje cun donazions ae Protezion Civîl». ❚