✽✽ Nol sarà facil frontâ lis sfidis dal 2021. Tancj e forsit masse i fronts dulà combati, ancje se il principâl al restarà ancjemò, e no savìn par trop, chel cuintri il Covid. Al è dificil podê sielzi su cuâi mandâ lis trupis di assalt, dulà slizerî la pression e infin, se al covente, cuant e dulà ritirâsi.
✽✽ Scusait il ton militaresc di chestis peraulis, ma e je stade simpri une bataie chê che il Friûl e i furlans a àn vût di combati pe proprie autonomie e, magari cussì no, vuê ancje dome par viodisi ricognossûts tant che popul. No dopri il tiermin minorance linguistiche parcè che mi somee limitatîf a pet de essence di une identitât li che la lenghe e je dome l’aspiet plui palês, la ponte di un iceberg, di une realtât teritoriâl, storiche, culturâl che si è determinade intai secui.
✽✽ Dome cu la cussience, critiche tant che o volês, ma ben clare dentri di nô, o sarìn in stât di confrontâsi cun ce che al sucedarà in regjon.
✽✽ Se il Stât al detarà lis liniis gjenerâls, e sarà però la Regjon a vêlis di adatâ al particolâr. Fasìn un esempli: il Recovery Fund al consegnarà ae Italie un grum di bêçs par un ciert numar di progjets, e une part di chei e varà di jessi presentade di plaçâl Oberdan. Di chel palaç fin cumò dome cualchi ipotesi e cualchi bufonade tant che chê di une gnove sede de Regjon in Porto Vecchio. O sin però sigûrs che i finanziaments europeans a Triest a rivaran a completâ il plan di disvilup urban e i gnûfs progjets de citât juliane in clâf internazionâl. Altris fonts a tocjaran traspuarts e grandis oparis: centris feroviaris intermodâi, autostradis, intun abraç di fier e di ciment in non dai colegaments simpri plui svelts des marcjanziis. Lis personis a son secondariis.
✽✽ La domande e je a chest pont no dome lecite, ma vitâl. Ce vantaçs i vignarano al Friûl di chest taramot finanziari, cuâi vantaçs pes nestris aziendis che – visìnsi simpri – a son chês che a son daûr a resisti, inte stragrande maiorance piçulis impresis a nivel artesanâl? Ce i ‘nt rigjavaraie la agriculture, ma ancje il stes turisim, condanât di un bol “FVG” a restâ anonim. “Une regjon puint” e declare cence nissun imbaraç la politiche regjonâl.
✽✽ Ma sot dal puint, a fate di barbons, o sarìn nô furlans, se no rivarìn a impedî che chescj plans imperiâi si realizin. O scugnìn vê dal dut clâr ce che i covente ae nestre tiere, al futûr des gnovis gjenerazions. Nol bastarà dî di no a progjets contraris ai nestris interès gjenerâi, al bisugnarà impedîju. Nol sarà facil e nancje indolôr, ma in bal e je chê dignitât e serietât che nus àn simpri caraterizâts. ❚
