Ma la Messe par furlan e ten bot

No son trops a savêlu, ma si pues seguî la messe par furlan cuasi ogni sabide. Mighe ta cualchi plêf su pe Cjargne o ta gleseutis spierdudis pai cjamps, ma propit in centri a Udin. O par radio, in direte su Radio Spazio, cumò che no si pues movisi cun masse libertât.
◆ La iniziative, poiade de Arcidiocesi, e je tacade intal 1984 e e va indevant in gracie di cualchi anime di bon cûr, tant che Sergio Venuti, premiât intai prins mês dal 2020 de ARLeF pal so grant impegn pe lenghe furlane, che nus conte cemût che e je nassude cheste aventure.
◆ “Intal 1984 e jere a pene jessude la traduzion de Bibie e i predis di Glesie Furlane a àn pensât che bisugnave metile in vore daurman”. Il prin an, la messe si fasè te gleseute di plaçâl Cele, midiant di bonsignôr Biasatti dal Sant Zorç in borc di Graçan. “Al jere un frêt di chei, no plui di trente personis, ma cun ducj i predis che a vignivin jù de Cjargne e de culine la sabide di sere”. Dal 1985 al 2000, invezit, in gracie di pre Romano Michelot, la messe si celebrà te glesie dongje dal tribunâl, fin a cjatâ une sede definitive intal Oratori de Puritât, indulà che e ven fate inmò in dì di vuê.
◆ Intai agns, la organizazion e je incressude e la celebrazion si è insiorade cui cjants des corâls che a rivin di dut il Friûl. “L’an passât si son esibidis passe 50 cjantoriis, cun grant plasê dai fedêi che a puedin scoltâ lis diviersis variantis dal furlan ma ancje il grant repertori musicâl che al diven de Glesie di Aquilee”.
◆ Une storie no di pôc, che e merete di lâ indenant, ancje in gracie dal jutori des gnovis gjenerazions. Sergio Venuti, di fat, al intint passâ il testemoni e si rimet ai plui zovins: “Il lavôr grues al è za prontât, bisugne dome lâ daûr de ferade. O ai imprometût a pre Moretti di no lassâ murî cheste messe, che e je tant che un lumin impiât vie pe gnot”. Chel ferâl cumò al lûs a fuart. No stin a lassâ murî la sô flame. ❚