Fevelant di Messâl e di Glesie Furlane, no si pues no vê iniment il documentari “Missus” (2017), che al conte propit des bataiis di chescj predis, massime chê pe messe in lenghe furlane. O ‘nt vin fevelât cul regjist, Massimo Garlatti-Costa, che l’an passât al à produsût un secont cine, “Predis, la nazione negata”, su lis figuris di pre Toni Beline, pre Bepo Marchet e pre Checo Placerean.
__
Cemût ti sêstu svicinât a Glesie Furlane?
Di frut o leievi i editoriâi di pre Beline su la Patrie dal Friûl, che gno pari al jere abonât. Tai agns o ai vût l’onôr di cognossi pre Roman Michelot e di deventâ amì di Christian Romanini, che mi contave ce che Glesie Furlane e faseve pal Friûl e pe cussience de sô int. Di li a Missus la strade e je stade curte.
__
Cemût âstu vivût il contat cun chest ambient?
Par me, che no soi mai stât un om di glesie tal sens tradizionâl, e je stade une scuvierte emozionante. O soi stât concuistât de passion, dal spirt e de fuarce tal puartâ indevant lis bataiis a ducj i coscj.
__
Cemût sono ladis lis presentazions di Missus e di Predis?
O crôt che Missus al sedi un dai films plui distribuîts, in Friûl e no dome. Al è stât proietât passe 50 voltis in regjon, uns 20 ator pe Italie e ancje tal forest.
In Friûl i Predis di Glesie Furlane a jerin simpri presints par rispuindi aes domandis. Cetancj spetatôrs a son vignûts plui voltis, menantsi daûr parincj e amîs. No vin mai vudis contestazions e chest al pues jessi let in dôs manieris: di une bande, nus dîs che lis ideis di Glesie Furlane a son condividudis, biel che di chê altre – ma o speri di sbaliâmi – nus dimostre che il furlan e il domandâ i nestris dirits no fasin plui pôre a di nissun.
Lis proiezions in Italie e tal forest nus àn fat capî che il messaç di Glesie Furlane al è universâl e al vâl par ducj i popui che a vivin un moment di pericul e di pierdite di identitât. I ladins lu àn cjalât come se al fos un film di int di famee. A Gjinevre, li des Nazions Unidis, un predi dal Sri Lanka si è alçât in pîts e mi à dit: “Jo o soi come chei predis tal film, o soi come lôr!”. Missus al è stât sielzût pal Festival Internazionâl dai cines Indigjens dal Messic, tant che esempli di resistence di une culture, di une lenghe e di un popul ae globalizazion.
Cun “Predis, la nazione negata”, invezit, o vin rivât a fâ cualchi presentazion prime de pandemie. Al è stât un sucès. Al è un film fuart, politic, che ti cjape tal cûr. Al è ancje une vore poetic. O ai cirût di dâi un tai une vore diferent di Missus, par creâ une esperience complementâr al prin film de trilogjie.
__
Ti someie che la bataie di Glesie Furlane e sedi condividude dal so popul?
La prime zornade di ripresis di Missus o jerin a Tarcint. A Pre ’Sef Cjargnel i jere stât dât il premi Pifanie pal lavôr incredibil di recupar de musiche tradizionâl furlane. Al à fevelât di dirits dal om e di dirit ae proprie lenghe e culture, che no jerin garantîts al popul furlan. La plui part dal public e je restade incantesemade, no rivave a capî il sogjet dal discors. Biel che o filmavi o ai capît subit indulà che al sta il probleme dal Friûl e dai furlans: inte ignorance di jessi e intal no savê di dulà che tu vegnis. Dut chest al puarte ae fin di une culture milenarie.
__
Ce public isal chel che al è vignût a viodi Predis?
Tante int e ven parcè che e cognosseve pre Checo o pre Toni, o parcè che e veve za viodût Missus o un altri gno film. Ma o ai vût plasê di cjatâ ancje tancj zovins che ae fin a saltin fûr cui voi che a barlumin e mi domandin ce che a puedin fâ pal Friûl… O ai simpri pensât che chescj cines a varessin di jessi presentâts intes scuelis. O vevin fate la esperience cun Missus e i students a jerin une vore cjapâts. E sarès une propueste di ripeti, cuant che al sarà pussibil.
__
Ce sens aial fevelâ di int dal passât, di autonomie e di lenghe furlane, ancje te liturgjie, cuant che il mont al è cambiât e si va indevant a doprâ simpri di plui l’inglês?
Il mont al va indevant inceât di un globalisim comerciâl, doprant la lenghe di un altri popul e dismenteantsi de proprie, combatint lis bataiis che i sorestants nus fasin crodi che si scuegnin combati. La int si lasse manovrâ. O crôt che mai come cumò o vedin di resonâ cui nestris cjâfs e liberâsi de laveblancjarie dal pinsîr unic.
I Predis di Glesie Furlane a son un esempli, une lûs, un pont di riferiment, massime ta chescj moments dificii pe culture e pe lenghe furlane. Lis vôs di pre Checo, pre Bepo e pre Toni a son simpri plui atuâls, plui fuartis e plui altis des fufignis che nus tocje scoltâ. La bataie pe aprovazion dal Messâl, fat e volût di Glesie Furlane, e je une bataie di dirit, che e à di jessi bataie di popul, o almancul di un popul che al è cussient di cui che al è. ❚
Sindic jo mame / “La nestre int no à mai molât. Covente fâ, no lamentâsi, par saltâ fûr dal pantan”
Walter Tomada
Alessandro Marangoni: la Aclif e deventarà istituzion di riferiment pai furlans “La Assemblee dai sindics furlans e je une realtât necessarie. E cul timp e deventarà ancjemò di plui un pont di riferiment pe identitât de nestre int”. Al è sigûr di chest Alessandro Marangoni, prin citadin di Dartigne, che al crôt tant inte Aclif […] lei di plui +
(L)Int Autonomiste / Autodeterminazion e dirits pai popui, uniche strade di pâs
Dree Valcic
✽✽ No podìn sigûr fâ fente che la vuere in Ucraine no dedi une serie di problemis intrigôs ancje aes fuarcis che si riclamin ae autodeterminazion dai popui e al ricognossiment dai dirits des minorancis etnichis. Prin di dut, ce che al è daûr a sucedi al è la ultime dimostrazion che chei problemis no […] lei di plui +
L'editoriâl / Macroregjons, une oportunitât di racuei
Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +
Ricorence / Pier Pauli Pasolini om contraditori e segnâl di contradizion
Pre Toni Beline
Tal centenari de muart di Pier Pauli Pasolini o ripuartìn a tocs la tierce part dal libri scrit di Antoni Beline tal 1993 ‘Trilogjie tormentade’, che e rivuarde propit il poete di Cjasarse I. RISPIETÂ IL MISTERI DAL OMLa sience plui dificile e je la cognossince di se stes. E se al è grivi cognossi […] lei di plui +
Int di Cjargne / La sporte de spese a km zero a ‘La Polse’ di Chiara e Matteo
Marta Vezzi
Di cualchi dì al è stât screât un gnûf servizi intal spaç e ristorant di Chiara e Matteo “La Polse di Cougnes” a Zui, indulà che si pues cumò cjatâ e comprâ prodots locâi. “La idee e je nassude pal fat che za nô intal ristorant o doprìn avonde materiis primis dal teritori – e […] lei di plui +
Il numar in edicule / Jugn 2022
Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +