Spirt di trape

La vecje art de sgnape
che i furlans no dismentein
In Friûl e je une culture profonde de sgnape che e va indaûr une vore intal timp. Si conte che ai 29 di Otubar dal 1334, pe fieste pe invistidure di Bertrant di Saint Geniès a patriarcje di Aquilee, al fos za une vore frêt. Cetancj a passarin la gnot sot dai puartis de basiliche imponente, e a buinore si ur puartà confuart cul “miglior rimedio della vernacia, del vin nero, e dell’acquavite che allora esenti da gabella si spillavano da botti e da botticelle, collocate sui carri, o sulle carrette…”, a contin lis cronichis. Si trate, forsit, dal document talian plui antîc sul distilât.
◆ Tal 1451, tal inventari dai bens dal siôr Indrì di Everart di Cividât, al ven citât un lambic. Tal ‘400, in Friûl, i distilâts di trape no vignivin dome produsûts, ma ancje espuartâts inaltrò tant che si pues viodi te tabele dai dazis che a vignivin scuedûts de mude di Sacîl. Pietro Andrea Mattioli, un luminâr de medisine rinassimentâl che al fo atîf a Gurize dal 1540 al 1554, al pensave che la aghe di vît “preserva la vita et custodisce, et ripara, notrisce, difende, et prolunga la vita”. Un so contemporani, il miedi furlan Giuseppe Rosacio (1530-1618), al magnificave lis virtûts de sgnape pe salût.
◆ Tal ‘700, un edit de imperadore Marie Taresie al ricompensave la fedeltât dai soldâts furlans dantjur la autorizazion a distilâ la sgnape in cjase cence paiâ la gabele. Dal 1797, tes cjalderiis di ram de tignude Vilegnove di Fare dal Lusinç si produsin sgnapis buinononis trasformant diretementri la trape. E je la uniche aziende vitivinicule furlane (e forsit taliane) a disponi di un lambic interni.
◆ Tal 1879, a opare di un marcjadant di non Domeni Campagna, e nassè a Cjasteons di Çopule la distilarie Pagura. E je la plui vecje des 14 ancjemò operativis in Friûl, e in dì di vuê e je la uniche ative in provincie di Pordenon.
◆ Par tradizion, la sgnape e je stade simpri bevude di bessole fintremai al 1970, cuant che al fo inmaneât a Udin un specific concors par cocktails che le doprassin adun cun altris bevandis.
◆ Une des resons che la sgnape e à cambiade muse e tipologjie di produzion e di consums, tai ultins agns, e je la “invenzion” de distilazion des trapis di une sole varietât di vît. Benito Nonino al è stât il pari di cheste inovazion che e à puartât al sucès la sô distilarie fondade a Percût. Tal 1973 al distilà une sgnape, fate dome de puinte blancje dal autoctoni e râr Piculit, e po cun chê de Ribuele zale. Di in chê volte, dutis lis distilariis furlanis e talianis a àn metût te lôr produzion une o plui sgnapis distiladis di une sole varietât di vît.
◆ Tal 1975 al è nassût il Consorzi pe tutele de sgnape furlane, che dut câs cumò nol funzione plui. La tipicitât de “sgnape furlane” e je ricognossude e protezude de Comunitât europeane dal 1989 e, dal prin di Avost dal 2016, e pues jessi imbutiliade dome tant che prodot finît (cence pussibilitât, duncje, di jessi “taiade”). ❚