Ce ise “La Patrie dal Friûl”? La Patrie e je la cjase dai furlans: il fogolâr là che si cjatin chei che no platin la lôr identitât, ma a resonin cun braùre su cemût che jessi furlans al jemple di un sens ancjemò plui profont la lôr presince tal mont di vuê e ta chel di doman. Di chei che a pensin ae lôr lenghe e ae lôr autonomie no tant che a un sierai, ma come a une clâf par vierzisi a chei altris e par cjaminâ a cjâf alt viers di un avignì che, se si à cussience di cui che si è, al puartarà plui oportunitâts a une tiere che e à simpri frontadis, cence rindisi, lis bugadis dal destin.
La Patrie e je chest: il gjornâl dai furlans che no si rindin, che no si rindin a jessi “minorance”, a jessi sotans, a viodi la lôr lenghe e la lôr comunitât ni rispietade ni tutelade. Di chei che a àn voie di cjalâ indenant cence dismenteâsi dai lôr paris, ma pensant soredut ai lôr fîs; a une zoventût sfracaiade te smuarse di une modernitât globaliste che e à inçussît i lôr gjenitôrs e ur à fat gjoldi un benstâ cence responsabilitât che cumò o stin za scomençant a paiâ. Se no si rive a dâi une fonde identitarie ae cussience di cui che ju dopre, ducj i socialimprescj e i digjitalargagns che a àn in man a finissin dome par fâur zirâ il cjâf e imboconâju cuntune vision standardizade e virtuâl dal mont, dulà che nol è di maraveâsi che l’amôr pe tiere, pe lenghe, pal ambient e pe storie dal teritori dulà che a son nassûts o dulà che a son rivâts, al puci di nostalgjic e di mufe, di vecje malinconie.
Ma la Patrie e covente propit a chest, di 74 agns incà: a dismovi une cussience, a formulâ domandis, a stiçâ dibatits cuntun sproc vivarôs e provocatori. Chest mistîr lu fâs une vore ben parcè che al è di in chê volte che al covente bati cuintri di chei che a metin in forsit la dignitât de comunitât furlane. Lu diseve ben pre Toni Beline: “Chest al è simpri stât il sfuarç dai furlans: vuadagnâsi la libertât di esisti”.
Par chest cont, la Patrie no si tire indaûr: dispès la sô vôs e berle intal desert, ma nol è simpri dibant. Un esempli lu vês su chest numar: la denunzie de mancjade aplicazion de leç 482/99 sui cartei stradâi de variante di Dignan e à sburtât FVG Strade a corezi no dome l’erôr, ma ancje la norme ambigue che lu veve determinât. Un esempli di responsabilitât che al è di preseâ, ma che cence il stimul de Patrie nissun nol varès mendât.
O savìn che vuê in Friûl al va avonde di mode mostrâsi “citadins dal mont”, che al è “trendy” platâsi e miscliçâsi tun sisteme di omologazion che, daûr de libertât di comprâ e di conetisi, al scove vie ogni diference e al glot ogni divignince. Ma forsit al è just e morâl contâ ai nestris zovins, prin che a tornin a jessi “libars di scugnî lâ”, che a son fîs prin di Aquilee che di Amazon, e di Bertrant plui che di Bezos, e che al sarès miôr che i lessin daûr a Cappello pluitost che a Fiorello.
Fevelâur di une Patrie che fin dal so nassi e je simpri stade cosmopolite e inclusive al somee robe “vintage”, come che si dîs cumò. Ma ce isal di anacronistic a volê fâ ben il mistîr di paris o maris che a vuelin insegnâ il furlan ai lôr fantacins? O a volê scombati parcè che lis decisions che nus tocjin a vegnin cjapadis il plui dongje pussibil aes nestris comunitâts? A son lis stessis resons che a vevin sburtât pre Bepo Marchet a vierzi chest gjornâl tal 1946, lis stessis che a vevin sburtât Pier Pauli Pasolini a di sul Stroligut “A vegnarà ben il dì che il Friul si inecuarzarà di vei na storia, un passat, na tradision!”.
Chel moment nol è ancjemò rivât. Ma cuant che al rivarà, al sarà ancje merit di chei de Patrie, chei che le àn scrite, le àn lete e le àn puartade indevant. Chei che no àn molât e no àn mai vude “pôre di ve coragjo” come che al domandave pre Checo Placerean, che al è nassût juste 100 agns indaûr e che o larìn a ricuardâ dilunc di chest an.
Chei come nô… chei come voaltris.
I furlans che no si rindin. ❚
