Cjaris letoris e cjârs letôrs,
cul prin numar dal an o lassi la direzion dal nestri sfuei “La Patrie dal Friûl” par impegns che no mi permetin plui di seguîlu cun dute la atenzion e cure che al merete. O ai agrât ai components dal Consei diretîf de associazion culturâl “Patrie dal Friûl”, editore dal gjornâl, par vêmi dade la oportunitât di fâ cheste esperience.
✽✽ A son stâts doi agns impegnatîfs tant che entusiasmants, sedi dal pont di viste professionâl che uman, caraterizâts dal impegn a contâ cul nestri particolâr pont di viste il Friûl di vuê, stiçant riflessions e proponint ideis pe cressite des diviersis comunitâts che lu componin e pai lôr dirits.
✽✽ Pontant a une informazion di cualitât, variade, che a àn contribuît gnovis firmis, il gjornâl al è rivât a un public di letôrs diversificât, che o ringracii di cûr pe fiducie, tant che ducj i colaboradôrs che a àn permetût, cul lôr lavôr preziôs, di rivâ a chest risultât.
✽✽ O lassi la “Patrie” in buinis mans: chês di Walter Tomada, colaboradôr storic dal mensîl, cuntune grande esperience tant che gjornalist, ancje in lenghe furlane, osservadôr atent e fin dal nestri Friûl. A lui l’auguri di un bon lavôr.
✽✽ Pal afiet pal sfuei che o ai vût l’onôr e la braùre di direzi e savint ben trop che al è impuartant che ognidune e ognidun a puartin il lôr contribût pe cause furlane – vuê plui di simpri -, o continuarai, cu la stesse braùre, a colaborâ cu la “Patrie”. O soi, di fat, convinte tal profont che un gjornâl tant che la “Patrie” al sedi indispensabil par rinfuarçâ la autocussience coletive dai furlans, il sens di apartignince comun al nestri popul, che in altre maniere al riscje la estinzion inte ignorance e disinterès difondûts, cu la complicitât e responsabilitât de classe dirigjente.
✽✽ Al è par chest che us invidi a continuâ a lei e a sostignî il nestri sfuei. Fasêtlu cognossi, cussients che un gjornâl dut par furlan al è un strument par afermâ la nestre diversitât linguistiche – che e je une risorse creative, un patrimoni culturâl e un dirit fondamentâl -, par afermâ e vivi la nestre identitât. ❚