Intai prins secui dal Imperi Roman, Aquilee e jere une des siet citâts plui impuartantis e, salacor, e veve passe 100.000 abitants.
LA VIVAROSITÂT_Une metropoli vivarose: imagjininsi la int dal puest che si moveve e businave insiemit cun chê che e vegnivin di fûr; marcjadants di dutis lis razis e di ducj i paîs cognossûts a rivavin par mâr su lis nâfs o par tiere de planure Padane e di di là des Alps (e che podeve capitâ che culì a muerissin e che a vegnissin sapulîts). Di dulintor, chei che a son a stâ in campagne a vegnin in citât a vendi i lôr prodots, magari un trop di pioris che us cjamine tra lis gjambis…
A aumentâ trafic e davoi il scjas dai cjars di len che a puartin breis, modons, claps, caratei, anforis… sul pedrât des stradis e chel dai nemâi che ju menin (ancje chei cun dôs çatis: i sclâfs). A chest rumôr si zontave il vosarili di chei che a vendin o che si cjapin da dî o che a publicizin un cualchi spetacul dal circ: une umanitât ferbinte da la periferie fin al forum, chel che in dì di vuê al sarès il centri storic, indulà che al è il cûr de citât e de vite politiche e la int si cjate par lâ a comprâ intes buteghis miôr, a discuti bevint alc, a berghelâ di comiziants e di comediants…
Nol jere sempliç vivi a Aquilee imperiâl, ma chest al è il presit che dutis lis grandis citâts a scugnin paiâ pal fat di jessi grandis.
LA FORTUNE DI VÊ IL MÂR DONGJE_La fortune di Aquilee e jere chê di vê il mâr dongje. No di jessi sul mâr: Grau al è il sô vêr puart di mâr. Ma di jessi a pocje distance e colegade al mâr midiant di un grant flum, il Nadison cu la Tor, che al permet aes nâfs di rivâ fin in citât e a cheste di no patî i discomuts di jessi sul mâr: sigurece cuintri lis burascjis, plui facile la difese, la campagne e i siei prodots sot man… Propit come Rome.
Ma lis ativitâts e restavin chês di une grande citât di mâr: e fâs la sô fortune sul puart e sul cumierç, ancje in ete preromane. La decjadince e scomençarà co si sierarà chê grande vie di comunicazion – pardabon une autostrade – che al è il so flum.
INDUSTRIIS_Sore dal cumierç, lis ativitâts a son chês “industriâls”: culì si cjate la plui grande fabriche di gusielis dal Imperi, e prodûs une vore di cops, lis feminis a filin e a tiessin cence polse e lis ativitâts artesanâls in gjenâr a son une vore vivarosis sedi par vie dal puart e des sôs necessitâts, sedi par vie dal grant trafic di int.
MÂR E CAMPAGNE_Un dai vantaçs al jere chel di vê la campagne dongje. Al vul dî podê rifurnîsi cun facilitât sedi di besteam che di prodots de tiere. Si coltave forment, i liùms, lis verduris, i ulîfs, i pomârs. Ma la culture plui svilupade e je, ancje in chê volte, chê de vît. Erodian nus conte che la campagne dulintor de citât e je dute tignude a vignâl e che i pampui a vegnin instreçâts ai pomârs in forme di zoiis, di mût che il lûc al samee simpri parât a fieste.
POSIZION “EUROPEANE”_La impuartance di Aquilee e dal so puart e divignive ancje de posizion strategjiche pal cumierç european de citât. Une buine rêt di stradis i permeteve di traficâ sedi cu la Italie sedi cu la Europe danubiane e balcaniche. I trafics no jerin nome economics ma ancje culturâi. Di Aquilee a fevelin cetancj autôrs classics, il mît di Aquilee al è inmò presint tes contis des Alps, sant Marc le sielzè sicu pont impuartant, colegament jenfri Orient e Ocident, pe sô evangjelizazion…
(*Test gjavât fûr e adatât dal libriposter nr.3 edit dal Consorzi Universitari dal Friûl)
