«La abolizion des Provinciis e je stade un flop. O sin in plene crisi, tant par dî, su la manutenzion des ex stradis provinciâls. Al baste cjalâ la vegjetazion sui ceis des stradis. Pardabon un disastri e no vin nancje interlocutôrs par protestâ. E volìno fevelâ dal disvilup economic? O vin dit a fuart al assessôr regjonâl Roberti che o vin bisugne di un ent di pueste pe mont. Par pensâ al disvilup, ma ancje ae gjestion dai servizis». Pietro Gerometta, sindic di Vît, al è une vore sclet sul judizi su la situazion istituzionâl atuâl.
__
In sumis, proponial di tornâ aes Comunitâts montanis?
«Cjalâ indaûr al bon che al è stât nol è un mâl. Jo o soi daûr a vivi la tierce riforme dai ents locâi, ma la vite de mê int e je lade simpri in piês. E je une robe che no si pues plui sopuartâ».
__
Ma no si fasaressino progjets miôr creant un sôl ent rapresentatîf dal Friûl, par fâ sinergjie ancje cu la Cjargne e cu la Sclavanie Furlane?
«Sigûr, par me la dimension de furlanetât e je cetant impuartante e fin a pôc timp indaûr o soi stât ancje vicepresident de Assemblee dai sindics de Comunitât linguistiche furlane. I nestris comuns de fasse da pît des monts dal Friûl Ocidentâl intal 1968 a àn scugnût patî une cesure dolorose cun Udin. Il Tiliment al è deventât cuasi une tendine di fier. La provincie di Pordenon e à volût cancelâ la sô anime furlane. E chest cence altri nol à plui di sucedi. Tant che comuns di mont o sin aromai ae cane dal gas: dispopolament fuartonon, desertificazion dai esercizis comerciâi, assence di une fiscalitât di disvilup. Tant che sindics o sin ben cussients che nol è pussibil lavorâ dome dentri dal comun singul. A puedin dânus ancje centenârs di miârs di euros, ma se no rivìn a fâ politichis comunis sui teritoris di aree slargjade no cumbinarìn nuie. Par chest o domandìn a plene vôs di gjestîsi di bessôi il teme dai plans di disvilup. No si pues pensâ che al podedi fâlu un president elet a Pordenon. Dal sigûr o vin tant plui in comun cui sindics de Cjargne».
__
Miôr duncje une Provincie dal Friûl che tornâ a proponi la Provincie di Pordenon?
«No vin nissune nostalgjie de vecje Provincie di Pordenon. No à fat nuie pai problemis de mont, nancje pe manutenzion des stradis e dai istitûts scolastics. Però o viôt masse inadeguatece inte politiche regjonâl par gjestî riformis e rivoluzions di grant respîr tant che chê de creazion di un Friûl unît. No je nissune volontât di metisi ator di une taule par analizâ il bon e il trist di ce che al è stât fat, e chest al è distrutîf. La sperance di viodi un Friûl unît e je la ultime a murî. Ma no son plui lis grandis personalitâts politichis dal passât, come i sindics de ricostruzion. Di fat, di in chê volte, il Friûl al è fer. Al varès di nassi un leader che al mostri la strade di un Friûl rinovât. Ma al orizont ancjemò no si lu viôt». ❚
Roberto Pensa