In dì di vuê, cualsisei ipotesi calade di adalt par creâ ents teritoriâi intermedis cuntune dimension diferente de ex Provincie di Pordenon e vignarès viodude cun grant suspiet dal teritori sacilot. Ma se il dialic tra lis diviersis componentis teritoriâls dal Friûl al tacàs des robis di fâ, a scomençâ de viabilitât e dal disvilup economic, si podarès cjatâ plui di un denominadôr comun. Carlo Spagnol, sindic di Sacîl, e vôs fondamentâl dal teritori dal Friûl venetofon, al è sigûr di chest.
«A son tancj i motîfs che nus sburtin a pontâ a tornâ indaûr ae vecje Provincie, prin fra ducj – al sclarìs Spagnol – il fat che cheste e à davuelt ben i compits che i jerin stâts dâts, massime la viabilitât e la manutenzion dai edificis des scuelis superiôrs, interpretant ben lis esigjencis teritoriâls. Il passaç ae Regjon des competencis provinciâls plui impuartantis al à dome che fat lâ in piês la cualitât dai intervents, complicant i percors burocratics e rindint plui dificii i percors di scolte, soredut intal setôr de scuele e dal ambient. Nol è facil lâ a Triest, cjatâ l’interlocutôr just e rivâ a sclarî lis propriis dibisugnis».
__
Ce asset istituzionâl viodial duncje in Friûl-Vignesie Julie pal avignî?
«Al è just tornâ a un ent intermedi di aree slargjade par gjestî ducj i servizis che a van di là dal ambit comunâl. Par come che a son ladis lis robis, chest interlocutôr al pues dome che jessi alc che al somei ae vecje Provincie di Pordenon. La dimension otimâl pe gjestion dai servizis no pues jessi chê dai distrets e dai ambits, che a son masse piçui, intant che si fâs masse fature a fâ funzionâ ben ambits plui grancj, come che al podarès jessi par esempli il teritori des vecjis Provinciis di Udin e Pordenon metudis insiemi. Ma chest ultin resonament al podarès jessi bon ta cualchi ambit particolâr, tant che la viabilitât».
__
Intai ultins 10 agns il Friûl al è la part de regjon che e je stade plui muardude de crisi economiche, stant che cheste e à cjapât tal cûr il setôr des manifaturis, che al è la anime de economie des tieris che a van dal Lusinç ae Livence. No crodial che al mancji un lûc di progjetazion e di elaborazion strategjiche pal teritori furlan e pal so tiessût di impresis privadis piçulis e mediis?
«O soi une vore dacuardi cun chest resonament, ma dome se nol ven di adalt, ma de condivision dai stes problemis. Cuant che si àn problemis simii lis istituzions a àn di racuardâsi. Jenfri i diviers teritoris a puedin jessi temis che si è dacuardi o che si è lontans, l’impuartant al è di vê la capacitât politiche par cjatâ un denominadôr comun. Il Friûl al à dal sigûr cualchi interès comun intes sôs diviersis componentis, lis dimensions masse piçulis dai ents a son improdutivis, ma ents che i lôr confins a son fissâts di altris e di adalt a produsaressin reazions contrariis fuartis, come che o vin viodût cu lis Uti. Bisugne scomençâ chest dialic dal bas, a tacâ no di teoremis, ma des dibisugnis de int». ❚
Roberto Pensa