La fam e ven mangjant
✽✽ I segnâi a jerin clârs fin dal principi e noaltris ju vevin denunziâts subite, cognossint ben la sotanance di un ciert Fedriga al dôs Zaia. Tai ultins timps dut câs la prepotence leghiste, sostignude a plenis mans dai siei aleâts di guvier, si à mostrade in dute la sô realtât vergognose, adun cu la determinazion dal Carroccio a umiliâ la Regjon, sometintle aes smiris venitis.
✽✽ E podarès someâ une robe di nuie, ma la sielte di destinâ 100 mil euros a une societât venite pe organizazion di une manifestazion ciclistiche in Friûl e risulte cuasi cence creance tai confronts di dutis chês associazions che a vevin partecipât al bant pai contribûts dal assessorât al turisim. No par vie che une gare in biciclete e sedi di stimâ come pôc impuartante, ma parcè che la societât che si è adiudicade la sume e risulte chê che e à vût la cifre plui alte in assolût, in barbe a tantis realtâts che cun fadie a fasin la lôr ativitât e che de Regjon no àn vût un euro.
✽✽ Cualchidun al podarà rispuindi che e je dute invidie o ben asse, viodût che jenfri di chês realtâts al è ancje chest gjornâl che al veve presentât un progjet di difusion de “Patrie” intes realtâts ricetivis regjonâls: la pussibilitât che il turist, l’ospit forest al podès cognossi ancje l’aspiet culturâl e linguistic dal Friûl. Strani che la stesse iniziative e ves vût, l’an passât, la poie de Provincie di Udin, de organizazion di categorie dai gjestôrs di albiercs e e ves otignût un sucès straordenari, come marcât plui voltis di chel che al jere il president Fontanini. Al ven il suspiet che, cuant che si à a ce fâ cul furlan, te Zonte regjonâl a sedin pardabon pocjis lis vôs amiis o che a vignedin cidinadis intun marilamp.
✽✽ Nissune maravee, dal rest. A tirâ incà il cjaveç dal turisim al è chel stes assessôr Bini che al va indevant a ripeti ogni dì che bisugne fâ scuadre cul Venit in non di un Alt Adriatic tant bramât che al pues dome penalizâ la promozion di Grau e di Lignan, in pro di Jesolo e di Bibion.
✽✽ Metìn dongje ancje lis sirenis unitariis che a rivin puntualis di Verone e di Trevîs pe creazion di une Confindustrie dal Nordest, une idee che a cualchi ascar pordenonês no i displâs par nuie, viodût che al fâs di dut, ancje i salts mortâi de storie e de culture, par fruçonâ la idee di Friûl. Si inacuarzarês, duncje, che il progjet di distruzion de nestre realtât regjonâl al fâs simpri pas gnûfs e pericolôs indenant.
✽✽ Aromai o sin rivâts al paradòs, a operazions cence rivuart tant che chê che e met in man a une struture de Regjon Venit il davuelziment des pratichis peadis ai contribûts europeans intal setôr de agriculture. O vês capît ben: i nestris agricultôrs a varan di fâ riferiment al Venit par chel che al inten lis normativis europeanis.
✽✽ La robe che e fâs plui stomi di chest ultin at al è che, a part i conseîrs dal Pat pe Autonomie, nissun nol vedi dit «se o sin deventâts mats», nissun nol à dât un cic. Ma lis organizazions sindicâls ce stano a fâ, chês di categorie parcè tasino?
✽✽ No volarès che il cidin al fos segnâl di complicitât. Se e je cussì, disêtlu a clâr che us plâs di jessi sbranâts dal Leon. ❚
Dree Valcic
