SPECIÂL – Vendeme 2009: cuantitât, cualitât e… lavôr!

Dopo tante fature, al è rivât il moment strategjic e plui impuartant da stagjon: benvignude vendeme!
Le vendeme dal 2009, cu lis machinis o a man, e je previodude abondante – fale burascjis atmosferichis dal ultin moment – e cuntun prodot di cualitât. In Italie si va slargjant la pratiche di srarî i raps, propit par alçâ la cualitât e par lâ daûr aes normis CEE. Chest orientament al varès di judâ ancjemò di plui la produzion di un vin che al pues competi sui marcjâts internazionâi. Ma il mont in crisi al fâs vignî fûr cualchi strapinsîr: i presits de ue a puedin risultâ no adeguâts, no si pues svendi sul marcjât butiliis preseadis: lis aziendis plui piçulis a riscjin di pierdi colps.
ESPERIMENT VOUCHER_ Une buine notizie e je dal sigûr: dopo la sperimentazion in Friûl e in Venit dal an passât, a tornin i «voucher», vâl a dî i «bogns lavôr», par facilitâ il paiament di chei che lavorin inte vendeme, ma ancje in tancj altris setôrs de agriculture.
Al lavoradôr a son garantidis lis cuvierturis INPS e INAIL e chescj paiaments son esentâts di tassis e no influissin su la situazion di disocupât o di parzialmentri ocupât.
In plui che in agriculture chest an, i voucher si puedin ricevi pai lavôrs in cjase, tal zardin, par ripetizions, pai lavôrs dai students in vacance (almancul 16 agns, o cul permès scrit dai gjenitôrs), pai pensionâts e in vie sperimentâl ancje par integrazions di salari o di supuart al redit (casse integrazion, mobilitât). Il valôr nominâl dal voucher al è di 10 euros e il lavoradôr al pues scuedi 7.50 euros in ogni ufici postâl.
Par cirî dute la normative, si pues lâ su www.inps.it. Le vendeme alore tant che une ufierte di lavôr ma ancje – come simpri – une fieste par ducj chei leâts al mont dal vin e de tradizions: buine vendeme a ducj!!!
Mara Piccoli