SPECIÂL – Par no dismenteâ il vecjo Tocai

La pierdite dal non dal classic blanc furlan: o fasìn il pont de situazion cun Cristina Coari, responsabile des relazions esternis di une aziende vitivinicule dal Cuei, autore dal libri «Bye Bye Tocai» (ed. Senaus)
L’affaire Tocai: cjartis boladis, avocats, politiche: isal dût finît?
La ultime sentence dai 5 di Novembar dal 2008 che e à decretât ilegjitime la leç «Salve Tocai» (vâl a dî, doprâ il dopli non «Tocai» in Italie e «Friulano» tal forest) e varès di vê metude la peraule fin a la cuestion Tocai. Il nemì nol jere la Ongjarie ma la Europe stesse, cun tantis sentencis che a confermavin che Tokaj e je une regjon vinicule e Tocai une vît. No varessin di jessi altris colps di sene (si spiete la ultime sentence 431/2004, ricors Italie) e la machine publicitarie dal «Friulano» e je partide. Ma se no si pues plui doprâ il non dal vin, si pues simpri nomenâlu e contâ la sô storie.
Ce aie insegnât cheste storie ae viticulture taliane e massime a di chê furlane?
Tancj erôrs a son stâts fats cul Tocai. Intant, il ritart iniziâl: si veve sîs mês par fâ ricors tal 1993, ma lis primis azions legâls a son partidis dome tal 2003. La politiche (a jerin i agns di Tangentopoli) e je stade dal dut assente, sedi a nivel nazionâl che locâl. Po la brute abitudin taliane di spietâ, di lassâ a chei altris lis rognis. Ancje i produtôrs a àn lis lôr colpis, par vie che a consideravin il Tocai tant che il vin di ostarie, chel dal taiut, un vin di serie B: migo un rafinât Sauvignon, un Pinot, come che a disevin lis modis dal moment, creadis dai media. Al è stât fat tant dopo dal 2003 ma cence un plan strategjic comun, stant che – massime a nivel regjonâl –  e mancjave la comunicazion tra lis variis parts in cause. Tant che a un ciert pont il partît dal Tocai e chel dal Friulano si son scontrâts, mostrant la spacadure profonde tal sisteme vitivinicul locâl. Incapacitât di fâ grup, di fâ sisteme par dâi un non al amât vin blanc.
Cemût staie lant la sielte dal «Friulano»?
E fûr de CEE?
Tal principi, il non nol veve convint tancj di lôr, par vie che si trate di un adietîf doprât par altris vins autoctons furlans (come il Verduç). Ma si veve di leâ cheste vît al teritori di indulà che e ven, costruî une gnove identitât, par no fâ dismenteâ il Friûl, dismenteât a favôr di tancj DOC de regjon. Ma de sconfite dal non e pues rivâ une vitorie: il Friulano al podarès deventâ il vin bandiere de nestre regjon. Dute la cuestion Tocai no nus à fat fâ biele figure, ma il Tocai al è deventât un vin di cualitât, al è domandât e vendût in dut il mont, ancje in gracie di cheste publicitât mediatiche. Ma fûr de CEE lis situazions a son difarentis e si pues cjatâ un Tocai Friulano prodot in Argjentine e in Australie. Friulano al è dome un non difarent dal Tocai, e la vere patrie dal Tocai e je il Friûl. Ma al convente che la Union Europeane tai acuardis internazionâi e garantissi miôr i prodots e lis marchis comunitariis, parcè che al samee che une aziende argjentine e vedi za copiât il non Friulano. Ancjemò plui confusion, duncje.
Prosecco (TS) par tutelâ il Prosec Talian? Ise une buine sielte par evitâ un gnûf câs Tocai?
Pal Prosecco, si à zuiât di anticip propit par evitâ un gnûf câs Tocai. La situazion e je però difarente, par vie che pal Tocai o fevelìn di teritori Friûl, dulà che il Tocai al è in ogni DOC (fûr di chel dal Cjars). Intal câs dal Prosec, si è slargjade la DOC fin a tirâ dentri il paîs di Prosecco (TS), dulà che cheste vît no je presint. Cul passaç a DOCG dal Prosecco di Valdobbiadene, Colli Asolani e Montello, al samee cuasi che la DOC Prosecco e sedi di serie B, ruvinant la imagjin di chest vin, costruide tal timp.
Mara Piccoli