Scozês e galês in place

La prime ministre scozese Nicole Sturgeon
e à proponût di fâ un altri referendum
pe indipendence de Scozie
Vie pal ultin mês in Europe a son sucedudis un grum di robis interessantis, in tiermins sedi positîfs che negatîfs. Un fat che al à lassât avonde scaturîts tancj di lôr al è chel de decision de Comission eletorâl supreme de Turchie che e à dât acet al ricors fat indenant de bande dal Partît pe justizie e pal disvilup (AKP, Adalet ve Kalkınma Partisi, conservadôr e confessionâl), vuidât dal president turc Recep Tayyip Erdog˘an, cuintri dal risultât des elezions aministrativis di Istanbul, là che e veve vinçût la aleance tra i socialdemocratics dal CHP e i nazionaliscj laics dal IYI. Par chel, pe definizion de aministrazion de citât tal Bosfar si varà di tornâ a votâ. Dal sigûr, a àn un significât plui preseabil, almancul se si cjale la realtât cun voi furlans, lis gnovis che a rivin dal Ream Unît, là che la prime ministre scozese Nicole Sturgeon e à tornât a fâ indenant la propueste che al sedi fat un altri referendum pe indipendence de Scozie, massime se Londre e larà dilunc su la strade de jessude de Union Europeane. Cun di plui, ai 4 di Mai a Glaschu/ Glasgow e je stade fate une grande manifestazion a pro de indipendence cun diviersis desenis di miârs di lôr in place, e une manifestazion cun chê stesse impostazion – ma a pro de indipendence dal Gales e cuntun numar di partecipants sot dai dîs mil – e je stade inmaneade ai 11 di Mai a Caerdydd/Cardiff. Ce che al à colpît di plui la atenzion di tancj vie pes setemanis passadis al è stât l’esit des elezions politichis tal Ream di Spagne, là che dongje dal sucès relatîf dal PSOE, de cressite gjenerâl dal numar di chei che a son lâts a votâ, dal crac dal PP e de novitât rapresentade dal 10 par cent concuistât de bande di une fuarce a clâr neofranchiste tant che Vox, e je vignude fûr la specificitât des nazionalitâts storichis e in particolâr de Catalogne e dal Paîs Basc, cui partîts nazionalitaris autonomiscj e indipendentiscj che a àn jonzût i lôr risultâts miôr intai ultins cuarante agns. In Catalogne, i indipendentiscj di çampe di Esquerra Republicana di Catalunya (ERC) a àn otignût plui di un milion di vôts, o ben il 24,6 par cent, e cuindis deputâts e pe prime volte a son deventâts il partît di maiorance relative di chê Comunitât autonome, tirant dongje consens suntune plateforme programatiche che e met adun autoguvier e dirits sociâi e che e je caraterizade di un ecuilibri delicât tra fermece e dialic cun Madrid. Ancje i centriscj indipendentiscj di Junts per Catalunya (JperCat) a àn viodût cressi i lôr consens in tiermins assolûts (di 481.839 a a 497.638 vôts) a pet dal 2016 (cuant che si à presentât tant che PDeCat), pûr passant di vot a siet seçs, intant che chel altri grup di çampe indipendentiste Front Republicà si è atestât ator de cuote 113 mil cence otignînt nissun. Buine la prestazion dal centriçampe di ambit statâl, cui dodis scagns concuistâts dai socialiscj e il ridimensionament de afiliazion catalane di Podemos, che e à paiât la sô ambiguitât su referendum e indipendence, pierdint vôts in direzion sedi di ERC che dal PSC-PSOE, intant che lis diestris spagnolistis che a àn fat dal anticatalanisim la lôr bandiere o che no cressin – al è il câs di Ciudadanos, cun cinc seçs compagn che intal 2016 – o che no sfonderin – i neofranchiscj di Vox cuntun sôl elet – o che “si strenzin”, tant che il PP cuntun sôl deputât. Chês stessis trê fuarcis no cjapin nissune sente inte Comunitât Autonome Basche, là che la maiorance dai scagns e va ai autonomiscj centriscj dal Partît Nazionalist Basc (sîs) e ae çampe indipendentiste di EH Bildu (cuatri) e chei altris vot a vegnin spartîts tra i socialiscj e Podemos, intant che in Navare lis fuarcis nazionalitariis (EH Bildu e Geroa Bai) a vuadagnin consens, ma no rivin a gafâ nissun deputât, stant che ducj i scagns a disposizion a vegnin spartîts tra il centriçampe e la drete di implant statâl e cuatri a van ae coalizion Podemos-IU-Equo-Berdeak. Al sucêt cuasi compagn in Galizie, là che il BNG (Bloque Nacionalista Galego) al doplee il numar dai vôts (di 45 mil a 98 mil) cence elei nissun, intant che doi dai puescj tal Parlament di Madrid ju à cjapâts la coalizion progressiste formade di Podemos-EU-Mareas en Comú- Equo. Coalizions similârs a rivin a mandâ lôr rapresentants ancje tes Isulis Baleârs e te Comunitât Valenziane, là che un seç al ven cjapât ancje dai autonomiscj progressiscj di Compromis, cence dismenteâ che a son stâts elets ancje doi rapresentants de Coalición Canaria (CCa-PNC) e, pe prime volte, un deputât dal Partido Regionalista de Cantabria e che ancje a Melilla i regjonaliscj a son rivâts dongje de elezion di un di lôr ❚
Marco Stolfo