CULTURE – Biondis al assalt

A Palermo, a un ciert pont dai agns Otante, si cjatarin lis redazions dai gjornâi e dai telegjornâi infestadis di bielis biondis, dutis bramosis di sfondâ. Lis lengatis a inaugurarin la espression di «biondisim», par indicâ la schirie di puemis propensis a dut pûr di jentrâ tal mont dal gjornalisim. Il passaç par cualchidune di lôr al jere obleât zontraviers di un concors di bielece, prime di capî che la lôr vite e sarès stade par simpri segnade de mission di informâ e di comunicâ. L’impuartant al è comparî. Cui si freial des competencis, di vê un titul di studis: baste sbati i voi e si àn i risultâts.
In Friûl, o sin daûr a passâ il stes fenomen. A samein lontans i timps là che o viodevin su Telefriuli la bionde Giorgia Bortolossi e la more Marina Presello. Lôr sì che a vevin competence. A comentavin, a leievin, a scrivevin. E a savevin ancje condusi, fâ lis telecronachis in direte dal stadi Friûl, intervistâ cun domandis judiziosis. Tant al è vêr che a ’nd àn fate di strade. Giorgia e colabore cun Sky, Marina Presello e je passade cun Antenna3 e Telenordest. Un lôr valôr: a jerin multifunzion. Dacuardi Udinês e il sport, ma a podevin fevelâ di dut, de cronache al costum.
Cumò al tocje contentâsi di Alexis Sabot. Cui? Alexis Sabot. Vâl a dî: atrat ae Pamela Anderson, ma inzessât. E à scomençât tant che valete di Claudio Moretti, e à partecipât a Miss Italia e po… bot e sclop… gjiornaliste. Metude a conduzion te fasse orarie che e fo dal duet Bortolossi – Presello. Il so avignî? Cussì lu viôt e lu spieghe jê intun sît internet: «Une biele cariere in tv, un microfon in man, nuie leams sentimentâi. O soi abituade a distrigâme pluitost ben ancje di bessole, e o cîr di risolvimi i problemis tirantmi sù lis maniis».
L’ultin esempli di blond girl cun ambizions gjornalsitichis e je chê di Tne/Antenna3. Une cierte Mara, «Marissima» Silvestre. Une che e vûl fevelâ di Udinês. E alore e cîr di intervistâ il cjalçadôr Samir Handanovič, corint daûr e clamantlu Jorgensen. E che par jessi plui part dal teritori (jê e je di Gjenue) e berle al microfon, dute scalmanade: «Fuerce Udin». Su Youtube a van in grant lis sôs falopis. Robe trash, come une interviste cuntune cjariese in bocje, cun tant di cuc spudât in direte. E deventarà la «Sportissimo girl», a flanc di chel brâf condutôr che al è Massimo Campazzo. Domande: parcè chei di Tne/Antenna3 no i cjatino une part plui simil a chê di Edy Campagnoli? Par dîle ae Walter Cronkite (gjornalist american muart di pôc): «And that’s the way it is». Si che duncje, fantats, chest al è il troi.
OSCAR PUNTEL