NO SON PERAULIS PAR VECJOS. Body shaming

Mandi nono!
Mandi frute!
Ce cjalistu par television?
No sai nancje jo ce program che al è. Al è cun chê presentadore ninine, un pôc penze…
Ma nono, no si disin chês robis li.
Ce robis, presentadore? Varessio di dî presentadôr femine?
Ma no, nono! Penze! Sù po, nol pâr bon.
Ma ce colpe aio jo, se e je cussì? O crodevi di fâi un plasê a no dîsi grasse.
Ma nono!
Taronde, vadial ben?
No!
Tarondute?
Nono…
Cemût si puedial dî, cuant che une tu fasis prime a saltâi parsore che a zirâi intor?
Sâstu ce che tu stâs fasint, nono?
Sì: pierdint timp par no ofindi une che nancje mi sint, parcè che e je dome par television!
Chel che tu stâs fasint si clame body shaming!
Body ce? Jo o cognòs dome il body building!
Body shaming, nono. Al è cuant che tu cjolis vie cualchidun pal so cuarp.
Ah! O ai capît di dulà che al ven. “Sceming”, al è come dî che un al è sem! Di fat, no crôt che chei che a passin la vite intune palestre a pompâ muscui a sedin tant inteligjents. Chei che a van a fâ lens a àn i muscui compagns, ma ae fin de zornade a àn ancje alc par scjaldâsi!
No, nono, il body shaming no jentre nuie cul body building. Shaming al vûl dî fâ vergognâ cualchidun. Al è sbaliât cjoli vie une persone dome parcè che e à cualchi chilo di masse, no?
Dome se tu crodis che vê cualchi chilo di masse e sedi une robe brute! Ricuarditi che i vues cence nuie ator a son pai cjans!
Al è body shaming ancje chel, nono! Cun dutis lis feminis che a àn problemis di alimentazion, di anoressie o bulimie, nol va ben nancje dî a une che e à dome vues.
Va ben. Ce varessio di dî a chê li, alore?
Chê li cui?
Chê penze.
Nono…
Chê tarondute.
Curvy, nono, vuê si dîs curvy!
No ai capît: un al varès di ofindisi se i doi dal taront ma no se i dîs che al è çurli?
No çurli, curvy! Al vûl disi formose. Cussì tu fevelis di formis e no di gras!
Ah, come chê robe li dal politically correct che tu mi vevis spiegade chê altre volte!
Sì, une robe dal gjenar.
E “diviersementri secje” si puedial dî?
No crôt, nono.
Dut câs, frute, di vuê o disarai ancje curvy invezit di taronde, ma a mi cheste menade dal body shaming mi samee une robe seme e vonde. ❚
Bete di Spere