A Basilian une mostre intal non dal morâr

Une mostre intal non dal morâr. E je chê che e je stade metude adun de bande dal Comun di Basilian inte sale consiliâr dal municipi. Il so titul al è Morârs, e e je stade screade uficialmentri al prin di Dicembar stât e si pues visitâle fintremai ae fin di Fevrâr di chest an.
La iniziative e met dongje lis arts visivis, la valorizazion dal paisaç e la promozion di une culture positive dal teritori tant che patrimoni de coletivitât.
«Morârs al è un progjet artistic, storic e culturâl – a sclarissin il sindic Marco Del Negro e il conseîr comunâl Adriano Venturini – che si ten dongje a strent cu lis azions che a son stadis inviadis de bande dal Comun cun chê di recuperâ e di difondi une culture dal paisaç e dal teren tant che bens comuns, di difindi e di rispietâ. «Il prin pas in cheste direzion – a zontin – al è stât chel de normative di control e di tutele che e je stade introdusude intal gnûf regolament di polizie rurâl, ma al covente ancje alc altri». E nas cussì la idee de mostre, inte suaze di un progjet che lis sôs peraulis clâf a son «morârs, paisaç, teritori, rispiet, lenghe, culture, comunitât, identitât, socialitât e dirits».
Cemût che al salte fûr dai so titul, i protagoniscj principâi de esposizion a son i morârs, element costitutîf e particolâr dal paisaç furlan, vuê compagn che tal passât, cuant che a vevin ancje un valôr concret e specific pe economie des nestris comunitâts. «I morârs – al  marche ancjemò Venturini – no rapresentin plui chê risorse economiche che a jerin un timp, cuant che a coventavin par tirâ sù i cavalîrs a pro de produzion de sede, ma a restin un simbul di resistence e di identitât de nestre tiere, sedi sul plan ambientâl che su chel culturâl». Dongje di chescj elements di fonde, il progjet promovût de aministrazion comunâl al à ancje chê di valorizâ la opare dai artiscj coinvolzûts te iniziative, che tancj di chei a fasin riferiment in maniere direte ae Union artistiche e culturâl di Basilian.
Lis oparis esponudis a son firmadis di Alberta Bearzotti, Ivan Buttazzoni, Ezio Cescutti, Elisa Collovati, Renato Croppo, Enrico De Marco, Manuel De Marco, Arianna Ellero, Enzo Fabbro, Renato Ferro, Antonio Fontanini, Catia Greatti, Luigina Iacuzzi, Mario Micossi, Laura Pallaro, Vincenzo Piccoli, Angelo Popesso, Rita Revelant, Alfio Talotti, Elisabetta Ursella, Pietro Villalta, Giovanna Zilli, Silvano Zompicchiatti.
La mostre si podarà visitâ fin ai 28 di Fevrâr, cun jentrade gratuite, dal lunis al vinars in orari di ufici, la sabide cun orari 10-12 e 16-18 e la domenie des 16 aes 18. Cun di plui, a son previodûts diviers events culturâi, tra conferencis e incuintris di musiche e di poesie.
Dutis lis informazions in detai in cont de mostre e dai apontaments si cjatin in rêt:
http://patrimoniofriulano.altervista.org – https://www.facebook.com/patrimoniofriulano
– https://www.instagram.com/patrimoniofriulano ❚
Marco Stolfo