Sfuei Mensîl Furlan Indipendent
Archivi de Patrie

IL DIRIT AL PAISAÇ. Il paisaç o sin nô

............

La impuartance di preservâ une anime
che si è metude adun in miârs di agns

__
__

Il profîl di une mont, la glerie di un flum, il sunsûr di un bosc, il so respîr di len e di fuee, ma ancje il pustot de plane, la grave o la morene, la poce di un palût, fin al cercli plui lontan dal orizont su la marine. E cussì duncje, ancje lis costelazions che a sbrissin vie pe gnot, i colôrs des stagjons, la criùre dal frêt che al piture di zulugne i prâts, o il scjafoiaç dal siroc che al sofle di Istât. Cheste e je la Nature, che e vîf di un timp di durade lungje, miârs di agns intun inzirli di gjenerazions destinadis a percepî cui lôr voi il stes contest par secui, sculpît intune imobilitât che e dissegne la forme e il profîl di un lûc. I regale une anime, une fisionomie peade ae gjeologjie, al lavôr lent dai elements che, tant che un scarpel, a dissegnis forme e profîl di un teritori.

Ma bisugne provâ a imagjinâsi un sfuei plui lizêr e trasparent che si poie parsore di chest teatri straordenari e profont, là che si poie la lidrîs plui profonde de nestre identitât, ven a stâi chê fisiologjiche, naturâl: e alore tu âs di figurâti la braide e la taviele, il nulî di une campagne ben coltade, il vignâl che al promet vin gjenerôs e che al cuvierç i roncs di une culine; e morârs plantâts ad art che a regalin pomis, colôrs e savôrs di gjoldi e di gustâ. E ancjemò trois e agârs, stradis e cjasis, borcs, vilis e cjistiei. E i materiâi di costruzion des struturis: il len o il clap, il marmul o il modon. Cops e scjandulis, gornis e cjampanis. Cheste e je la Culture, che e vîf di un timp plui svelt, destinât a trasformâ dut intal zîr di cualchi gjenerazion, un sfuei parsore di chel altri, strât par strât, pandint dulinvie relicuiis, olmis, memoriis che a resistin e che a continuin a vivi insiemi cul gnûf che al ven dongje, passant fûr par fûr i secui tant che pâi di len che a cuchin fûr de aghe dal timp: bandonadis tant che ruvinis o reinventadis, glotudis intun insiemi che cul so miscliç spontani al ufrìs un cuadri di disordin ordenât, di simetrie asimetriche, spieli maraveôs dal uman e de sô storie.

Ancje i nons che i nestris antenâts a àn dât ai lûcs a deventin une testemoneance fuartonone di dut chest. Lis peraulis a van consideradis tant che formis di vite che nus contin la anime origjinâl di un lûc, ancje cuant che il lûc si è trasformât in maniere radicâl. A son la vôs di chei popui che par un pôc di timp a son passâts, lassant un segnâl che si tramande sui lavris, cu la vôs. E che nus conte di boscs di faus (Feagne) o di tiere pustote di baraçs (Baracêt), di bearçs di miluçârs (Merêt) o di tiere di palût (Paluce), cuant che aromai dut al è cambiât. La sience de toponomastiche nus da la clâf juste par vierzi puartis che se no a restaressin sieradis par simpri.

Ve, chest al è il Paisaç: la union perfete di Nature e di Culture intune dimension dinamiche, destinade al cambiament, progressîf e cuasi impercetibil, di durade lungje, o pûr violent e crût, dramatic e paurôs: un taramot o une vuere, un slac o une aluvion a scarpelin vie intun moment secui di trasformazions, imponint une riprogjetazion radicâl dai doi plans, chel uman e chel naturâl, daûr di un progjet gnûf, peât simpri a di une idee, a di un sium, cualchi volte a di une utopie. La proiezion coletive di un popul che al decît di restâ peât al so lûc e ae sô storie, e di tirâ indevant bande il timp che al vignarà.

I studiôs dal paisaç a san ben duncje che a scuegnin simpri fâ i conts cun dutis chestis variabilis, concentrantsi su lis intersezions. A san ancje, e chi il discors al devente dificil, cjapant une vene psicologjiche o adiriture esistenzialiste, che nol esistarà mai paisaç cence il voli di cualchidun che lu cjale, interpretantlu cul sintiment che si pas di memorie, di nostalgjie, di ricuart, ma ancje di sêt di gnûf, di cambiament di prospetive. Par chest, bisugne jessi educâts ae sô leture. No dome par vivi in maniere plui responsabile e cun plenece il nestri benstâ intun paîs, ma ancje par vê chei imprescj che nus judin a preservâ une bielece e une anime che si son metudis adun in miârs di agns, cul impegn di oms e di feminis che nus àn precedût in cheste aventure maraveose de vite.

Cemût che a disevin i antîcs, ogni gjenerazion e ven clamade a zontâ o a gjavâ alc intal segn di une armonie complessive dificile di teorizâ, regalant il cuadri, inte sô bielece funzionâl, a chei che a vignaran dopo di jê. Un biel impegn, che si varès di frontâlu fin de scuele: usâsi a cjalâ, a doprâ cence ruvinâ, braurôs e zelôs di tante sioretât che e fâs di un puest e dai siei abitants une creature vivente uniche, ferbinte e simbiotiche, un organisim tal sens stret de sô etimologjie, ven a stâi une entitât che e cjape forme e anime e vite dome se ogni so element al reste intarsiât in armonie cun ducj chei altris.

Ognidun di nô al è, in fin dai conts, un “gnûf rivât”, un ospit, un forest (che, par restâ tal zûc de etimologjie paisagjistiche, al è un abitant dal bosc). Imparâ a condividi la lidrîs, gjoldi de bielece, deventâ part essenziâl dal dut, jessi colôr che nol stone intal insiemi dal cuadri: al vâl par chei che a nassin e par chei che a rivin di fûr. Preservâ il paisaç e je ancje garanzie par une esistence plui rispietose e plui libare di ducj e par ducj. ❚

Agnul Floramo

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +