Sfuei Mensîl Furlan Indipendent
Archivi de Patrie

IL DIRIT AL PAISAÇ. Paisaç, ben comun di difindi e rispietâ

............

Nol à ni un marcjât e nancje un presit,
ma al à un valôr economic che al derive
des funzions che al pues davuelzi

La valorizazion e la tutele des risorsis paisagjistichis ambientâls e torne in maniere periodiche ae atenzion de opinion publiche e dai aministradôrs, ancje in virtût de cussience cressinte che lis modalitâts di difusion dai insediaments residenziâi e produtîfs e, plui in gjenerâl, dal davuelziment di cualchi ativitât economiche a àn provocât il degrât de cualitât paisagjistiche e une pierdite consistente di paisaç rurâl. Che si pensi, par esempli, che la regjon Friûl-Vignesie Julie si è cjatade intal 2017 al cuint puest tra lis regjons cul consum plui alt di teren, rivant a un valôr dal 8,92%. In regjon, e je stade une pierdite di teren naturâl di 292 etars (+0,41%), valôr che nus met al secont puest intal panorame talian, dopo dal Venit (+0,50%). Grande part dai cambiaments rilevâts a jentrin tal consum di teren reversibil inte classe “Cantîrs e altris areis in tiere batude”. Chestis areis, in tancj câs, a vignaran trasformadis in consum di teren permanent.

Il paisaç al è une risorse economiche fondamentâl e al influìs su la funzion ricreative e turistiche dal teritori: di fat, lis bielecis di un lûc a son une des motivazions principâls che a sburtin un turist a visitâlu. Cun di plui, al contribuìs a creâ la imagjin dai prodots locâi e a cressi la domande di marcjât, al influence la salût e il benstâ dai residents, midiant di une miôr cualitât di vite e dal abitâ, e al incrès il valôr dal patrimoni imobiliâr.

Lis risorsis paisagjistichis ambientâls, duncje, a àn un valôr economic che al derive propit des funzions che a son in stât di davuelzi e dai bisugns che a sodisfin. Il paisaç però al jentre inte categorie dai bens publics e par chest nol à ni un marcjât e nancje un presit, pûr vint – cemût che si à viodût – un valôr pe coletivitât. A ‘nt derive che l’operâ spontani des fuarcis economichis nol puarte a assets paisagjistics sodisfasints dal pont di viste de societât e che al covente l’intervent public, midiant di misuris di conservazion, di miorament o di valorizazion dal paisaç.

Dongje dal intervent public, di resint si è fate strade ancje la ipotesi de aplicazion di un strument specific di marcjât definît “Paiaments pai servizis ecosistemics”, che al podarès vê disvilups interessants in cjamp rurâl talian. Si trate, in detai, di contrats concludûts in maniere volontarie tra privâts, che a àn par ogjet la furnidure di un servizi paisagjistic ambientâl.

Sedi par prontâ chescj struments inovatîfs, sedi par valutâ la eficacitât e la eficience dai contribûts erogâts midiant dal intervent public, si à, però, di disponi di metodis di stime dal valôr, o sedi dai beneficis – che si gjavin dal paisaç – par stabilî se si belancin o mancul i coscj che a derivin de erogazion di contribûts, dai vincui imponûts o dal paiament fat.

I studis su la valutazion economiche (monetarie e no) dai bens paisagjistics ambientâi a furnissin un supuart in chest sens, stant che a àn disvilupât metodologjiis in stât di tignî intal cont just lis particolaritâts dal ben paisaç che a puedin jessi sedi di gjenar no monetari sedi monetari.

Dai studis fin cumò puartâts indevant cun chestis basis cognossitivis sul paisaç rurâl, ancje in Friûl a vegnin fûr informazions interessantis pal futûr: di fat, di une bande si evidenziin i pôcs contribûts erogâts pe conservazion e pe valorizazion dal patrimoni paisagjistic a pet dai beneficis che di chel a derivin, e – di chê altre – e risalte la dibisugne di educâ la coletivitât sedi ae valutazion dai beneficis che a vegnin dal ûs sostignibil dal paisaç che ae condivision des sieltis su la cure des risorsis paisagjistichis ambientâls.

Une strade juste par otignî un cuadri di tutele e di valorizazion dal paisaç rurâl furlan e je chê tacade de Regjon Friûl-Vignesie Julie che e à aprovât il Plan paisagjistic regjonâl (eficaç dai 10 di Mai dal 2018), in atuazion dal Codiç dai bens culturâi e dal paisaç e de Convenzion europeane dal paisaç. Il Plan al è un strument fondamentâl di planificazion finalizât ae gjestion dal teritori inte sô globalitât e inte prospetive di un disvilup sostignibil, cul obietîf di integrâ la tutele e la valorizazion dal paisaç intai procès di trasformazion teritoriâl, ancje tant che jeve significative pe competitivitât de economie regjonâl. ❚

Francesco Marangon
Dipartiment di Siencis economichis e statistichis – Universitât dal Friûl, President de Societât taliane di economie agrarie (SIDEA)

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +