ATUALITÂT – INCHIESTE. 4. Libri vert pe Sanitât

Diretôr, ce disial dal Libri vert su la sanitât in regjon?
Te mê lungje cariere o ‘nd ai lets no pôcs di Libris verts… Dal sigûr, chê dal assessôr ae Sanitât Kosiç e je une biele iniziative, o speri che e puarti a cualchi bon risultât: l’assessôr si è mot ben fin cumò.
Cuâi sono i ponts dal Libri che i son plasûts di plui?
Sui tredis cjapitui dal document, o ai cjalât cun interès chel li che si fevele di formazion professionâl. O varès pontât di plui su chest aspiet, par vie che secont me si trate di un cantin di fonde pe sanitât di vuê ma soredut par chê di doman: la persone e à di jessi centrâl tal mont de sanitât. L’aspiet de formazion, tacant des universitâts, al è strategjic, e si varès di tratâlu plui a fonts. Tai ospedâi e covente int preparade e motivade; cun di plui, simpri mancul zovins a vuelin deventâ miedis e infermîrs.
Chest parcè, secont lui?
Par vie che chestis dôs figuris professionâls a domandin tancj sacrificis e, soredut tal câs dai infermîrs, la lôr paie e je pardabon misare. Saial che cumò come cumò, in dute Italie, a varessin di jessi za in pension dîs mil adets dal personâl sanitari? Dal sigûr a mancjaressin chei che ju rimplacin.
Cemût rimedeâ a dut chest?
Tornant a pontâ sul singul, su la sô professionalitât, su lis sôs capacitâts e su lis sôs motivazions. Al è un discors che o stoi puartant indevant di agns.
Cuâi altris cjapitui dal Libri vert sono stâts di so interès?
Chei che a rivuardin in maniere direte il nestri istitût, vâl a dî la cuistion des disabilitâts gravis. Noaltris al Gervasutta o fasìn riabilitazion di alt nivel: chest al è un probleme di frontâ daurman par vie che, cul lâ dai agns, la int e vîf simpri di plui e lis dificoltâts tal movisi a stan tibiant simpri plui personis. Ancje lis vitimis di incidents su la strade a àn dispès problemis par recuperâ ad in plen la funzionalitât dal cuarp. E je dute int che e va seguide, rinfuartint struturis fûr dai ospedâi, che no podin stâur daûr cemût che al coventarès.
Tante int, ancje in Friûl, si lamente pai timps di spiete pes visitis specialistichis: cemût risolvi cheste cuistion?
Par dî il vêr, almancul metât di chei che a cjapin apontament pes visitis no varessin propit di fâlu. Secont me si varès di dâ ai miedis di famee il compit di istruî la int a pretindi il just dal sisteme sanitari, pontant inmò di plui su prevenzion e cognossince dal propri cuarp.
Voaltris come Gervasutta ce vêso fat in cheste direzion?
Ai 26 di Setembar al sarà un an che, dutun cul distret sanitari, o vin inviât une iniziative in diviersis palestris di Udin par judâ la int a fâ gjinastiche terapeutiche preventive. O vin tirât dongje fin cumò uns 500 di lôr, e o vin chê di slargjâsi ae perifarie dal cjâflûc dal Friûl.
Sul Libri vert no si fevele piç dal ûs des lenghis minoritariis tai rapuarts jenfri personâl sanitari e pazients…
Al è un aspiet che noaltris o vin tocjât cun diviers progjets peâts al furlan. Dut câs no mi sint di fâ un apont al document par cheste mancjance.
Alessio Potocco