Il “badant” des piecis di çuç di malghe

Sebastiano Crivellaro al à pontât dut sul rapuart cul teritori,
cirint lis sinergjiis cu la microeconomie locâl
In France ju clamin ancje oresins dal formadi, ma Sebastiano Crivellaro al à miôr nomenâsi “badant” di piecis di çuç di malghe, che al cure cul amôr e cu la atenzion di un pari fin a puartâlis al grât just di madressiment. «Fâ l’afinadôr al è un pôc come fâ l’educadôr. A fâ fîs, di fat, a son ducj bogns, ma cressiju e je dute une altre robe. Jo o puarti i miei formadis ae etât madure e o stoi ben atent che no mi deventedin bintars».
Un mistîr che al è nassût scuasit di une epifanie, une dì che, vignût a cjatâ i siei te cjase di Sauris, al è stât cjapât pe gole dal savôr di un formadi locâl che il pari al veve comprât e lassât in bande a invecjâ. Pe prime robe, però, al è restât striât dal paîs e de sô comunitât, tant di decidi di molâ dut e di trasferîsi li, lant daûr de sielte dai gjenitôrs, padoans che però, une volte rivâts ae pension, a àn pensât di comprâ un stali di meti a puest e di fâlu deventâ il lôr nît e ancje un B&B. Di li e je nassude ancje la decision di cjatâ un lavôr che al fos peât al teritori e che lu valorizàs. Parcè no butâsi su la stagjonadure dal formadi, inalore, viodût che sedi Sebastiano che il pari a vevin lavorât tal setôr alimentâr (lui ta chel de panificazion, il pai ta chel dal vueli di ulive)? Intun prin moment, al è facil nasâlu, la int di li no ur à abadât masse e, anzit, plui di cualchidun si à domandât ce che chel zovin rivât di difûr al pensave di cumbinâ. Ben planc, però, cualchidun al à tacât a infidâsi, e il fantat, che in chê volte al veve a pene trente agns, in gracie di sacrifici, passion e indurance, al è rivât a concuistâsi la colaborazion e ancje l’afiet de comunitât interie. «O vin tacât dal nuie, provant e sperimentant di autodidats. Al inizi o vendevi i miei prodots tes buteghis specializadis ator pe Italie, a Milan, Turin, Gjenue… Cuindis agns indaûr al sarès stât impussibil pensâ a di un marcjât interni in regjon. Cumò, par fortune, lis robis a son cambiadis une vore: o vin un biel zîr di ristorants, locâi e buteghis ator pal Friûl, par esempli la buteghe di alimentârs Tomadini di Cormons, che o vin une buine intese».
E lis sôs piecis a son pardabon golosets unics, stant che a vegnin lassadis a stagjonâ intun stali a Lateis, a 1370 metris sul nivel dal mâr, un dai ponts di afinadure plui alts in dute Italie. Il çuç, par altri, al ven des malghis de zone e al è fat cun lat crût, no pasteurizât. «Jo o lavori cuntune materie che e je vive e duncje delicade e in continue evoluzion. Su 10 piecis che si prove a puartâ a une stagjonadure di 2 agns, par esempli, dome 3 a rivin ae fin dal percors, chês altris a àn di jessi consumadis prime».
Sebastiano al à pontât dut sul rapuart cul teritori, tiessint relazions cu la comunitât e cirint lis sinergjiis cu la microeconomie locâl. «Di doi agns o fâs ancje il formadi afinât te bire, che nol esisteve in Friûl. O ai pensât al “Ubriaco”, chel metût sot de trape, e viodût che culì si prodûs la bire Zahre mi à someade une sielte naturâl. Te stesse maniere, al è nassût ancje il formadi ae cjanaipe, altri ingredient doprât de birarie. Une specialitât peade a Sauris al è ancje il Greiser Khase, che si fâs metint la piece sot di une misture di jerbis che a vegnin dopradis di une aziende dal puest par fâ tisanis».
Un lavôr dûr, duncje, li che no si finìs mai di imparâ e che nol lasse timp par poiâsi, ma che se puartât indenant cu la filosofie juste al da ancje sodisfazions e al stice a lâ indenant cun entusiasim. «O ai passât i prins 10 agns a spudâ balins, ma cumò o cjapi sù ce che o ai semenât tal timp. Bisugne lâ indenant su chest troi, che al è ancjemò dut di rive sù: si à di pontâ a miorâsi di continui, cun rispiet dal prodot e atenzion pal client. Il nestri biliet di visite a saran simpri serietât, professionalitât e cualitât».❚
Serena Fogolini