Sfuei Mensîl Furlan Indipendent
Archivi de Patrie

Model Tirôl pal Friûl

............

Tirôl traviersât dal trafic pesant
Tirôl traviersât dal trafic pesant

Il Land austriac al à imponût, in non dal rispiet dal ambient,
limitazions impuartantis al trafic dai Tir su la dorsâl dal Brennero

Une notizie buine e une triste pe economie furlane. O scomencìn di chê buine. Il lunc cidinôr che di decenis al tocje l’Interpuart di Çarvignan al somee finît. Ator di chei binaris e di chei plaçâi fin cumò deserts, di cualchi setemane al è dut un balinâ di vagons, locomotôrs, bilics e Tir di indulà che marcjanziis e materiis primis a passin de gome ae sine e vicevierse. Merit des trê cubiis di trens setemanâi (ma che in curt a deventaran zornalîrs) che a unissin la stazion furlane cun chê di Rostock inte Gjermanie dal Nord, su lis spuindis baltichis, e di chi lis destinazions de Scandinavie. Al è il mitic coridôr feroviari Adriatic-Baltic (par cumò, plui ogjet di cunvignis e di articui di gjornâl che di veris oportunitâts pal Friûl) che si dismôf. No, no jentre (ancjemò) la moderne “Vie de Sede” che i cinês a volaressin fâ par fâ deventâ Pechin il centri economic dal mont e che, si dîs, e podarès vê intal puart di Triest un dai siei ponts vitâi. Inte Basse Furlane, tant che sui imbarcjadôrs de citât di Sant Just, par cumò si fevele par todesc. E al è significatîf che la iniziative e sedi dome imprenditoriâl, cul coinvolziment di doi colòs austrogjermanics de logjistiche (Lkw Walter e Kombiverkehr) cu la cjase triestine di spedizions Parisi. Insume, nuie “sponsorizazions” regjonâls par fâ fente che lis tantis desenis di miliarts des vielis liris e i centenârs di etars di teren agricul sacrificâts tacant dai agns Otante sul altâr de stazion di Çarvignan a coventassin a alc; in chest câs e je pardabon une domande di traspuart su sine che e ven dal puart di Triest (il so president Zeno D’Agostino al à confermât che in Setembar e je partide la spuele feroviarie cui interpuarts di Fernetti e di Opicina, che di fat a trasformin la Ausse Cuar intal retripuart triestin) e de industrie furlane (par esempli l’Electrolux).

Fin chi la notizie buine, ma chê triste?

Intes tipologjiis di marcjanziis traspuartadis no si viôt ancjemò cuissà ce di interessant in clâf future par ipotizâ che il coridôr Adriatic-Baltic, di là di une grande servitût di passaç pal Friûl, al puedi ancje jessi tratîf pal insediament di ativitâts industriâls di trasformazion des cjamis in passaç, o de bande di sogjets che a puedin viodi inte Basse Furlane un trampulin di lanç par rivâ in maniere svelte cu la ferovie ai marcjâts siôrs de Europe Centrâl. E, se no puartin vantaçs concrets sui teritoris che a passin, i grancj coridôrs, feroviaris o autostradâi che a sedin (o pensìn ae lungje code dai Tir su la A4) a finissin par jessi servitûts e coscj ambientâi enormis. O pensìn par esempli al grant consum di teritori de tierce corsie autostradâl, al progjetât dopleament de ferovie Çarvignan-Palme o al cuadruplicament de Vignesie-Triest, al ampliament probabil cun gnûfs capanons dal Interpuart di Çarvignan (za previodût di plans regoladôrs).

Ce fâ?

La rispueste e sta intune riprese di sovranitât dai teritoris singui a pet dai apetits ingorts (di profit) de globalizazion. Un grant model al è il Land austriac dal Tirôl, che al à vût il cûr di imponi, in non dal rispiet dal ambient, limitazions impuartantis al trafic dai Tir su la dorsâl dal Brennero, cundut des stocadis dai Guviers e dal mont economic talian e todesc, e ancje de Union Europeane. Lu à dit a Çarvignan screant il gnûf tren ancje il rapresentant di Lkw Walter: «Al pues someâ contraditori par une grande aziende che e fâs ancje traspuart su gome, ma jo o vîf in Tirôl e o cognòs trops problemis che al cree li il trafic pesant. La politiche e à di sburtâ la economie a fâ lis sieltis plui justis pal futûr». Al è un resonament che al funzione no dome par stradis e pes feroviis, ma par dutis lis infrastruturis (pensìn par esempli ai eletrodots) che a pretindin di passâ pal nestri Friûl agjitant la bandiere dal disvilup. La vere cressite economiche no je dade des conveniencis di periodi curt, ma di resonaments plui amplis sul futûr. Compit de politiche al è chel di pretindi no dome che ogni invistiment al sedi fat daûr dai miôr standards ambientâi pussibii, ma ancje di orientâ i invistidôrs a cjalâ bande modei di sostignibilitât ambientâl vincidôrs intal futûr, ancje se magari un pôc plui onerôs intal presint.

Un esempli concret?

Aleantsi cul Tirôl e cul Sudtirôl e imponint cun Autovie Venete limitazions al trafic dai Tir su la A4, la Regjon Friûl-Vignesie Julie e podarès incentivâ la intermodalitât feroviarie des marcjanziis sul as Verone-Çarvignan-Nord e Est Europe su une Pontebane che e je doprade dome par une piçule frazion de sô capacitât, e slizerint il trafic autostradâl su la A4 e sul as dal Brennero. No dome cuntun vantaç ambientâl, ma ancje creant forsit oportunitâts di gnûfs insediaments industriâi ator dal rinfuarçât Coridôr Adriatic-Baltic e dal puart di Triest. ❚

Roberto Pensa

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +