Sfuei Mensîl Furlan Indipendent
Archivi de Patrie

INTERVISTE. L’ultin baluart dal Friûl al vûl contâ di plui

............

DIEGO NAVARRIA (foto Massimo Garlatti-Costa)
DIEGO NAVARRIA (foto Massimo Garlatti-Costa)

«O fasarìn sintî fuarte la vôs dal Friûl
intal dibatiment su la riforme des autonomiis locâls»

Assemblee de Comunitât linguistiche furlane, at secont! L’organisim che, intal intindiment dai promotôrs, al veve di jessi l’embrion di un autoguvier de componente culturâl e linguistiche plui impuartante de Regjon, ma che la Zonte Serracchiani e veve istituît cun competencis consultivis fragjilis, cuntun procès machinôs di adesion dai Comuns e cence cualsisedi struture di supuart, al à screât in plen Istât il so secont mandât trienâl, tornantsi a afidâ ae vuide di Diego Navarria. I sindics dal teritori furlan a àn tornât a dâ fiducie al prin citadin di Cjarlins che, no cate chei che si auguravin un flop de operativitât de Assemblee, dal Lui dal 2015 al Lui dal 2018 no dome al à savût racuei la adesion di ben 114 Comuns sui 173 totâi che si declarin furlans (daûr de zonizazion de leç 482/1999), ma cui siei intervents puntuâi intal dibatiment politic al à dât altece al compit de Assemblee di lavorâ pe coesion, no dome culturâl e teritoriâl, ma ancje economiche e sociâl dal Friûl.

La Assemblee si è dade adun ai 28 di Avost, te Sale Ajace, in presince dal assessôr regjonâl aes Autonomiis locâls, Pierpaolo Roberti, dal sindic di Udin Pietro Fontanini e dal president dal Consei regjonâl Piero Mauro Zanin. «E jere presinte une cincuantine di sindics, no mâl viodût il clime balneâr – al riferìs Navarria -, e al jere ancje un public discret, no dome esponents dal mont culturâl furlan, ma ancje tancj citadins sempliçs. Mi à fat tant plasê!».

President, ce belanç fasial dal so prin mandât?

«Al è stât un mandât costitutîf no facil di frontâ. Dut al è scomençât dai Laboratoris di autonomie promovûts di 16 sindics, finîts intune propueste sostignude dopo in Consei regjonâl dal conseîr Claudio Violino intal ambit de riforme des autonomiis locâls, la innomenade leç regjonâl 26/2014 che e à istituît lis Uti. A pet di chês che a jerin lis spietis, la leç e à introdusût l’organisim de Assemblee de Comunitât linguistiche furlane, ma depotenziantlu une vore. Pe adesion e je stade previodude fintremai une convenzion di aprovâ de bande di ducj i Conseis comunâi e chest al à compuartât un lavôr burocratic enormi. Cundut achel, ai 15 di Lui dal 2015 o sin rivâts ae prime Assemblee za cun 55 Comuns aderents».

Insume, cundut di cheste “gjambadorie burocratiche”, al è stât daurman un sucès.

«Sì, parcè che par saltâ l’ostacul de convenzion, e je stade promovude une ativitât intense di relazions interpersonâls tra i sindics che e à dât risultâts otims. Intun ciert sens, al à zovât a fâ plui sintude e motivade la adesion ae Assemblee. Passât chest ostacul, al è restât purpûr il fat che la Assemblee no à personalitât juridiche, no à personâl e no à un propri belanç, duncje si rêç dome sul volontariât dai sindics intal davuelzi lis sôs competencis, che si puedin riassumi inte pussibilitât di intervignî intal procès di formazion dai ats legjislatîfs dentri dal Consei des autonomiis locâls. Intai fats però, la Assemblee de Comunitât linguistiche furlane e à savût esprimi une grande capacitât di rapresentance. A man a man che a vignivin fûr inte atualitât problemis storics dal Friûl, insiemi al consei diretîf o ai podût intervignî cu la fuarce dal mandât di desenis di sindics intun cjamp di azion tant slargjât, che no si limite ae lenghe e ae culture, ma che al cjape dentri dute la vite di chês comunitâts che a esprimin la lenghe e la culture furlanis».

La assence di une struture organizative aes spalis, nancje di consulence, e je stade però un fren grâf…

«Dal sigûr. Cui che al opere intal Consei des autonomiis locâls, al ricêf cualchi dì prime des riunions il materiâl par podêsi preparâ sul ordin dal dì. E se a son di frontâ 2-3 dissens di leç biei pençs o che su chei no si àn competencis diretis, e devente fondamentâl une consulence legâl o specialistiche. Par fortune, e esist ancje la rêt dai sindics. O soi intervignût dispès, o ai ancje rivât a puartâ propuestis intes leçs regjonâls. O vin dimostrât alc che forsit il legjislatôr regjonâl no si spietave formant la Assemblee de Comunitât linguistiche furlane in chel mût».

__

Ce frenial i Comuns furlanofons che ancjemò no àn aderît ae Assemblee?

«A son lis zonis estremis de ex provincie di Pordenon, dulà che cheste apartignince e je sintude di mancul. Cun di plui, cualchidun de cuarantine dai ex “Comuns ribei” aes Unions teritoriâls intercomunâls no àn volût aderî ae Assemblee par rimarcâ un dinei totâl de leç 26 che e à istituît lis Uti e pe pôre di invalidâ i ricors presentâts, pûr aderint dome a une part di chê norme. Dut câs, intal complès, e je za une rapresentance dai doi tierçs dal mont furlanofon».

__

Cuâi i programs pal gnûf mandât?

«Te Vierte si sierarà il gno secont mandât tant che sindic di Cjarlins, no plui rinovabil, e duncje no podarai plui jessi president de Assemblee. La prossime scjadince eletorâl aministrative e rinovarà i vertiçs di 120 Comuns e duncje e sarà la dibisugne di un gnûf diretîf. Fin ae Vierte, o larìn indevant intal impegn par otignî la adesion di gnûfs Comuns e intal jessi la vôs de Comunitât furlane. O vin in program dopo ativitâts specifichis tant che, par esempli, in colaborazion cul Centri interdipartimentâl pal disvilup de lenghe e de culture dal Friûl e cu la Agjenzie Regjonâl pe Lenghe Furlane, un cors par sindics e funzionaris comunâi dedicât a dut ce che al tocje la tutele de lenghe furlane, lis istituzions coinvoltis e lis oportunitâts a cheste conetudis. O vin constatât di fat che tra i aministradôrs dispès no je clarece su chescj ponts. Il cors al sarà supuartât di un piçul finanziament de Regjon, gjestît de ARLeF, che in graciis di chel forsit o rivarìn a creâ un sît internet e un logo».

__

La Assemblee e tutele no dome i dirits de comunitât furlane, ma ancje chei dai citadins singui che a vuelin tutelâ i propris dirits linguistics…

«Di fat, o sin daûr a racuei tra i sindics lis firmis par une mozion che e fâs proprie chê za aprovade in Lui dal Consei regjonâl ae unanimitât su la Rai, par che e rinfuarci lis trasmissions par furlan in tv e radio e pal potenziament de sede di Udin che po dopo e varès di produsi chestis trasmissions. O ai za racueltis tantis adesions e o ai chê in curt di inviâlis al diretôr gjenerâl de Rai. Di pôc, o soi intervignût refudant la propueste di Progetto FVG par une Regjon costituide a trê pontis. I 15 Comuns furlanofons de ex provincie di Gurize si viodaressin confondûts intune entitât che e cjape dentri la citât metropolitane di Triest. Il gno intervent al à dismovût tant dibatiment».

__

La Assemblee e sarà cumò clamade a dî la sô su la riforme des autonomiis locâls che e varà di meti rimiedi al disastri Uti…

«In ocasion de mê riconferme, l’assessôr regjonâl Roberti si è dimostrât atent ae corispondence tra il teritori dai ents di gjestion che a vignaran creâts e il lôr valôr identitari, un concet ribatût plui voltis. O ai dit al assessôr che si sintin partecips di chest procès legjislatîf e che o parteciparìn a pene che la Zonte e varà presentade la sô propueste. Roberti al à inviade ancje une letare a diviersis istituzions, e tra chês la Assemblee, par domandâ di enunziâ cualchi diretive di principi che e varès di ispirâ la riforme. O rispuindarìn domandant di rinfuarçâ lis competencis de Assemblee e la sô dotazion di struturis, e di semplificâ lis proceduris di adesion. O disarìn che e covente une istituzion rapresentative dal Friûl, inte sô dimension plurilinguistiche, e che la Regjon no pues compuartâsi tant che lis ex potencis coloniâls che a segnavin liniis su la cjarte gjeografiche, ma che si à simpri di sintî lis popolazions interessadis, sedi lis comunitâts che i Comuns».❚

Roberto Pensa

L’EDITORIÂL / La multiculturalitât e valorize il grant e il piçul

Zuan Marc Sartôr
Belle époque. Un student di Gurize al viaze cul tren dilunc la Südbahn (la Ferade Meridionâl, di Viene a Triest). Al torne a cjase dopo agns di studi inte universitât de capitâl imperiâl. Al à frecuentât la preseade facoltât di fisiche, là che si davuelzin lis prestigjosis lezions dal professôr Jožef Štefan, il famôs fisic […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +