Paîs Basc ae prove de indipendence

Ai 18 di Novembar referendum a Donostia poiât de maiorance des fuarcis politichis e sindicâls baschis
La cuistion de lenghe e dai dirits linguistics, chê dal autoguvier e chê de justizie a son simpri viertis, un pôc dapardut ator pe Europe e soredut tal Paîs Basc. In particolâr, in Euskal Herria al torne a saltâ fûr a fuart il probleme de mancjance di une justizie juste e de permanence di chê distorsion juridiche e jurisprudenziâl che di tancj agns e segne la realtât di chê comunitât. No esist plui ETA, ma par une cierte justizie spagnole al somee che al vali ancjemò il teoreme dal “todo es ETA” .
Juste il prin di Jugn, la Prime sezion penâl de Audiencia Nacional e à dât fûr la sô sentence in cont de barufe tra un grup di fantats bascs e un pâr di agjents de Guardia Civil in libare jessude, che e jere capitade ai 15 di Otubar dal 2016 intun ambient di Altsasu. Par vie che il fat al jere sucedût in chê localitât navare che e à une marcade conotazion politiche abertzale (nazionalitarie basche), la Procure e veve stramudât daurman chê risse di ostarie intune azion teroristiche. La robe e jere someade esagjerade ae Audencia Nacional, che e à fat colâ dutis lis imputazions leadis al terorisim. Cundut achel, la sô sentence e à assegnât ai vot zovins di Altsasu il massim de pene par dutis chês altris acusis: de agression a public uficiâl aes lesions e dai disordins publics aes menacis, ingriviadis dal odi cuintri des fuarcis di polizie. Par chel, la decision dai magjistrâts e je stade calcolade tant che une pene esemplâr par fâi cuintri a cualsisedi forme di dissidence tal Paîs Basc. Cussì, doi dai acusâts (Oihan Arnanz e Iñaki Abad) a àn vude une condane a 13 agns di preson, altris doi (Jokin Unamuno e Adur Ramírez de Alda) a 12 agns, trê di lôr (Jon Ander Cob, Julen Goikoetxea e Aratz Urrizola) a 9 agns e une (Ainara Urkijo) a 2 agns.
Inte zornade stesse de sentence, la comunitât di Altsasu si à strente ator dai zovins e des lôr fameis intune manifestazion di solidarietât. Ai 16 di Jugn e je stade fate ancje une manifestazion popolâr te capitâl navare, Iruñea/Pamplona, propit cun chê di protestâ e di domandâ une justizie vere, juste e cence prejudizis. Diviers i câs li che si à cjapade posizion in cont de cuistion: pe çampe nazionalitarie di EH Bildu, pal Partît nazionalist basc (Pnv) e par Elkarrekin Podemos, chê de Audiencia Nacional e je une sentence “politiche” e “injuste”, intant che ancje de bande di partîts, organizazions e rapresentants politics dal indipendentisim catalan a son rivadis espressions di solidarietât cui fantats condanâts.
Cualchi dì prime, ai 10 di Jugn, une part impuartante dal Paîs Basc e je stade segnade di une altre manifestazion popolâr. Passe 175 mil personis a àn dât vite a di une cjadene umane di 202 chilometris che si à disvoluçade di Donostia/San Sebastian a Gasteiz/Vitoria, passant par Bilbo/Bilbao. La iniziative, inmaneade de organizazion Gure Esku Dago, e je stade ancje une ocasion par manifestâ la poie al procès di indipendence de Catalogne e par domandâ la liberazion dai presonîrs politics catalans.
Gure Esku Dago, che tes sôs iniziativis al cjape ispirazion dal procès di autodeterminazion catalan,  e à ancje chê di inmaneâ consultazions a nivel comunâl par domandâ ai citadins se a vuelin la indipendence dal Paîs Basc. Ai 18 di Novembar, un referendum di cheste fate si fasarà ancje a Donostia. La consultazion e je poiade dal PNV, di EH Bildu, di Elkarrekin Podemos e dai sindicâts ELA e LAB, vâl a dî la maiorance des fuarcis politichis e sindicâls baschis. PNV e EH Bildu, tal Parlament de Comunitât Autonome Basche, inte suaze dai lavôrs sul gnûf Statût di autonomie, a vevin fate buine ancjemò ai 24 di Mai une ipotesi di preambul là che si ricognòs il dirit di decidi dal popul basc e si definìs “paritari” il so rapuart cu la Spagne. A Madrid, ma ancje i unioniscj di chenti, no le àn cjapade masse ben.
In cont de lenghe basche a son simpri un grum di iniziativis. Tra chestis al merete ricuardât il progjet Euskaraldia, che al à chê di incressi l’ûs sociâl dal euskara. La iniziative e à la poie di passe 350 Comuns e 85 entitâts associativis di dut il Paîs Basc dal sud, là che dai 23 di Novembar ai 3 di Dicembar dal 2018, dutis lis aministrazions comunâls e lis organizazions che a aderissin ae campagne si son impegnadis a doprâ la lenghe basche in ogni ocasion pussibile.
Rivendicazion e azion. ❚
Marco Stolfo