SLOVENIE. Viers l’incaric a Janša pal gnûf Guvier

Tant che in Italie ancje in Slovenie, dulà che al è in vore un sisteme proporzionâl cun nivel di sbarament al 4%, lis ultimis elezions parlamentârs dai 3 di Jugn a àn evidenziade une grande framentazion dal vôt: nûf il numar record des formazions politichis che a son jentradis in Parlament. La vitorie relative e je lade al Partît democratic sloven (SDS, partît di centridiestre) di Janez Janša, che al è stât za dôs voltis prin ministri.
Il so partît al è rivât cuasi al 25% dai consens, otignint cuasi il dopli dai vôts de Liste di Marjan Šarec, new entry de politiche statâl (Šarec, sindic di Kamnik, al è stât l’aversari principâl di Borut Pahor aes ultimis presidenziâls slovenis) e cumò seconde fuarce slovene politiche cul 12,6%. A lâ daûr, cun risultâts tra il 9 e il 10%, i Socialdemocratics, SMC (partît vuidât dal ultin prin ministri Cerar che cuatri agns indaûr al veve otignût il 34,49% dai consens) e la çampe. A son jentrâts in Parlament ancje NSi (Gnove Slovenie – Democrazie cristiane), SAB, il partît di Alenka Bratušek, prime prime ministre femine slovene, il Partît dai pensionâts DeSUS e il Partît nazionâl sloven SNS. La afluence al vôt e je restade sot dal 53%.
Janša però dificil che al rivarà a formâ il Guvier, viodude la no disponibilitât di cuasi dutis lis fuarcis politichis a colaborâ cun SDS. Al varès pussibilitât plui grancj Šarec che al è daûr a tentâ cu la proprie liste di formâ une coalizion di centri cun SD, DeSUS, SAB, SMC e NSi (che però al è daûr a tratâ ancje cun Janša). Il prin risultât concret e je stade la elezion a president dal Parlament dal leader di NSi Matej Tonin (al è stât votât ancje di SDS e SNS e al à racuelt 80 vôts su 90).
In ogni câs, ancje dopo doi zîrs di consultazions dal president sloven Borut Pahor cui cjâfs grup, al moment di lâ in stampe, une maiorance parlamentâr in Slovenie no je. Pahor al sarès intenzionât a chest pont a segnâ tant che mandatari il vincidôr relatîf des elezions Janša, che però cence la garanzie di podê otignî la fiducie nol acetarà la incarghe (cumò al pues contâ dome su 35 vôts). Al podarès a chel pont tocjâi a Šarec, se al vignarà firmât intant l’acuardi par un Guvier di centri.
Dal gnûf Parlament a fasin part ancje i rapresentants des dôs comunitâts nazionâls ongjarese e taliane che a àn dirit al seç garantît. La comunitât taliane e à elet Feliç Žiža, diretôr sanitari dal Ospedâl gjenerâl di Izola e vicesindic de citât, chê ongjarese invezit Ferenc Horvath, president de Comunitât Autogjestide de Nazionalitât Ongjarese dal Pomurje. Par ce che al tocje la rapresentance feminine, tra i novante gnûfs parlamentârs dome 22 (il 24%) a son feminis, 4 agns indaûr a jerin 32. Il parlamentâr plui vecjo al è Peter Jožef Česnik (classe ’45) di SAB, chê plui zovine (28 agns) e je invezit Jerca Korcˇe di LMŠ; de classe ’90 al è ancje Žan Mahnič di SDS. ❚
Tjaša Gruden