La strategjie de Regjon, fin cumò, e je basade suntune aleance tra Friûl e Triest che e fâs dal coridôr Adriatic-Baltic, direzion di trafics essenziâl tra Nord e Sud, une risorse. Sul coridôr (chel percors feroviari a alte capacitât che, in regjon, si poie su la ferovie Pontebane Udin-Tarvis e, intune otiche di intermodalitât, sul puart di Triest) a son logadis diviersis zonis industriâls dal Friûl centrâl (vuê dadis adun intun gnûf Consorzi), che a podaressin disfrutâ cheste circostance ancje par tirâ dongje gnovis ativitâts industriâls. Ma par che il progjet “Puart-Regjon” – là che lis ativitâts tai imbarcjadôrs a son integradis cun chês dai interpuarts intal teritori dilunc des dorsâls feroviariis sot de regjie de Autoritât di sisteme portuâl dal mâr Adriatic orientâl – nol sedi dome che une servitût di passaç a pro di Triest, e covente une plui fuarte capacitât strategjiche dal Friûl di cirî di otignî i propris obietîfs, Friûl che al à di vê une rapresentance impuartante tes struturis decisionâls.
In gracie dal status di zone francje, il puart triestin al à cognossût une espansion inedite, soredut pe intermodalitât feroviarie di ciertis marcjanziis. Lis impresis furlanis, però, no son rivadis a zovâsi cuissà ce ad implen di chest fatôr competitîf. Alc si môf. “L’interpuart di Çarvignan al è bielzà plen”, al dîs Zeno D’Agostino, president de Autoritât portuâl di Triest, che e anunzie l’esperiment di convois dal interpuart furlan cun colegaments al puart triestin. «Çarvignan al deventarà un hub feroviari di riferiment». Di fat, sot de regjie di Triest. Duncje, il Friûl aial dome di sperâ intes ricjadudis positivis dal disvilup dal puart julian o puedial zuiâ une part di protagonist? E cui indi puartaraial indenant lis istancis?