«Ladins dal Friûl»: fats 10 agns e gnûf sît Internet

Il mensîl in lenghe furlane «Ladins dal Friûl» al fâs dîs agns. Il sfuei, di fat, al è stât fondât tal 1998 dal diretôr responsabil Renzo Balzan, cun editôr la associazion culturâl «Friûl tal Nord». In chescj dîs agns a son jessûts 120 numars dal gjornâl cun passe mil articui su argoments difarents: leterature, recensions, storie, tradizions e atualitât, cuntune atenzion particolâr ai temis de autonomie.
Scrit dut par furlan e componût, fotocopiât e spedît in propri par ridusi il plui pussibil i coscj, il gjornâl al à simpri vude la smire di mantignî, e infuartî, i rapuarts e i scambis culturâi cun chês altris regjons ladinis des Dolomitis e dai Grisons svuizars, di fat in ogni numar dal sfuei si cjate une pagjine di informazion sui fats de cronache e de culture di chei altris grops ladins.
Dal 2002 e je stade inviade la publicazion di «Ladins dal Friûl» on-line sul web, che cumò al è stât a pene rignuvît e al à screade la gnove direzion internet:
www.ladinsdalfriul.eu
Te suaze de cunvigne sul gjornalisim ladin fate a metât di Mai a Vich (par talian: Vigo di Fassa, provincie di Trent, viôt pagj. XX, ndr.), o vin fat cualchi domande al diretôr Balzan.
10 agns di «Ladins dal Friûl»: cemût la salût dal sfuei?
Ben, fin tant che e va ben chê dal diretôr. Il sfuei al è un gjornâl di testemoneance e i contribûts a son limitâts, ma no si mole mai: impuartant cumò al è stât lâ in Internet.
Cuâi sono i rapuarts jenfri i ladins in dì di vuê?
A part cheste biele iniziative dal incuintri dai gjornaliscj o sin intun moment di ferme. No son plui personaçs tant che Agnul Pittana che al tignive i rapuarts cui Romançs de Svuizare o come Lois Crafonara dal istutût ladin de Val Badie, cumò metût un tic in bande, che al vignive dispès in Friûl. O speri che cheste cunvigne e puedi screâ une gnove stagjon di contats, magari tacant cul memoreâ i grancj personaçs che si son batûts pe unitât ladine dal passât, tant che Pitane o Tellini.