Fieste dal Friûl di Rivignan: la prime edizion e je za stade un sucès

31-10-2017: GRANDE FIESTE DAL FRIÛL
Cunvignis e ideis,
tais e golosetâts,
marcjât e gjostris,
sbeletadis e mascaris,
zûcs e magjiis,
corâls e cjantosis,
vueris e pestadicis,
fûcs e flamis e bataiis tal cîl,
striis e aganis,
bandieris dal Friûl
e fieste dute la gnot.
Cussì e jere presentade la prime Fieste dal Friûl di Rivignan. Dut si pues dî, ma no che il sindic Mario Anzil nol vedi iniziative. Prin di dut, chê di vê rivât a fâ la union dai doi Comuns di Rivignan e Teôr, robe che tai ultins timps in pôcs a rivin a fâ. Po dopo la iniziative dai referendum Tutti per il Friuli par fâ lis provinciis dal Friûl e di Triest e cuintri de riforme des Uti, che la Regjon no à acetât di fâ ancje se lis firmis suficientis a jerin stadis tiradis dongje dutis. E cumò, la idee di une grande Fieste dal Friûl di fâ ai 31 di Otubar, cun chê di lâ cuintri di Halloween, la fieste comerciâl di divignince americane che si fâs te Gnot dai Muarts, e invezit promovi lis nestris tradizions di une volte in chest periodi dal an. In plui, il riferiment storic a une fiere di 600 agns fa visitade dal Patriarcje Ludovì di Tek.
Il risultât al è stât une partecipazion straordenarie di int cun tancj biei coments plens di braùre pal Friûl che si puedin cjatâ ator pe rêt. Par dî la veretât, vie pe fieste si è viodude ancjemò tante int mascarade di Halloween, ma la suaze dal paîs e jere dute furlane: bandieris nostranis pardut, balonuts blu cu la acuile, il cjampanili cul simbul de Patrie proietât parsore, fûcs artificiâi. Prime de serade, la cunvigne C’è un futuro per il Friuli? cul stes Anzil, il professôr Mario Bertolissi e il diretôr dal Messaggero Veneto Omar Monestier, e la presentazion dal libri Intervista immaginaria a Tiziano Tessitori di Roberto Meroi (intervistât su La Patrie di Març). Di ultin, un spetacul in place cu la calade de “acuile infogade”: une acuile furlane luminose e je stade fate cori par aiar, passant dal cjampanili “impiât di lûs” cu la bandiere furlane a di chê altre bande de place.
Finide la fieste, o vin sintût un Mario Anzil une vore sodisfat: «Plui di cussì no si podeve sperâ: 50.000 furlans ducj insiemi no si viodevin dai timps di Zico»

Tornarêso a fâ la fieste?
Daûr di chest grant riscuintri, no si pues fâ di mancul! La Fieste dal Friûl di Rivignan e à di deventâ un apontament classic pal popul furlan, che si fasarà ogni 31 di Otubar.
I riscuintris? E je stade une fieste di popul, ancje pe suaze legre che o vês metût sù…
La int e jere dute contente e le ai viodude braurose di sintîsi furlane. Mi à impressionât ancje la presince dai zovins, che magari agns fa no saressin mai lâts a une “Fieste dal Friûl”.
La fieste e je stade presentade ancje tant che une sorte di anti Halloween: il teme aial cjapât la fantasie de int? Isal un inizi par tornâ a cjapâ in man lis nestris tradizions vieris?
No ducj a jerin dacuardi di presentâle tant che alternative a Halloween, ma la presince di popul e dîs che i timps par tornâ a pandi ciertis nestris tradizions ancje di chest periodi al è rivât. Par chest, il “slogan” de fieste al jere Une fieste di cocis, striis e aganis: dute robe nestre, ancje lis cocis. ❚
✒ Dree Venier