(L)INT FURLANE. Un popul unît al è plui fuart di ducj i manganei

Plui a passin lis oris di cheste domenie al 1 di Otubar, plui a corin lis imagjins de zornade in Catalogne e plui mi ven sù un malstâ, plen di rabie di une bande e di comozion di chê altre.
**Viodi i poliziots in neri, simii a milizians fassiscj di un cine di fantasience bati cu la sodisfazion di fâlu, rapresentants armâts di une vision franchiste dal stât, mi sdegne e mi fâs berlâ devant de television. In cjase, ducj a strategnin il respîr. E dopo, a son i slambris di lûs, vierts des musis des feminis e dai oms catalans, di zovins e di vecjos, di operaris e di comerciants, in file par oris par esercitâ la vere democrazie, cuntune forme di autocontrol devant de brutalitât de Vuardie Civîl che e cjate la fuarce di resisti dome inte cussience di no vê di dâ nissun lincin ae propagande di regjim.
**Ma e je une foto che plui di altris mi fâs vignî i sgrisui: chê là che si viodin i pompîrs di Barcelone fâ di scût uman cuintri i manganei falangjiscj, a difindi la lôr int.
**Chestis a son lis istituzions, chestis lis personis che si fidìn. E di ca a nassin doi resonaments che a rivuardin in maniere direte il Friûl.
**Il prin al è propit su lis istituzions, sui rapresentants dal podê che si son compuartâts cussì dome in ocasion dal taramot, e par vie che, tant che interlocutôr, a vevin un popul cussient, determinât e autonom intes propriis sieltis. Di cui podìno fidâsi vuê? Sergio Cecotti, par figurâ la crisi dal sisteme politic regjonâl, in tancj dibatiments al domande se tra il public presint al sedi cualchidun che al met la sô fiducie intun cualsisedi dai elets a Rome o a Triest. No ai mai viodût une man alçâsi.
**O vin duncje une classe dirigjente che no si fidìn, ma che o patìn lis sôs sieltis e indreçaments, cence pussibilitât di repliche, se no mandantju ducj a cjase.
**La seconde e tocje invezit la mentalitât gjenerâl sui temis  dal autonomisim e des minorancis: intai dîs passâts i gjornâi talians plui impuartants, lis televisions, a àn tentât in ducj i mûts di presentâ la cuistion catalane tant che anacronistiche o dome economiche. Dopo a àn dât la peraule ai esperts e o vin assistût ae sagre de ignorance e de malefede. Un “gran varietât” dulà che in maniere puntuâl la storie antighe dal autonomisim catalan e jere ignorade e il referendum al vignive presentât tant che un rivoc di une masse di violents e di antidemocratics.
**La fuarce des imagjins, la fuarce di un popul, za di domenie di sere ju à costrets a fâ retromarcjis parziâls: a duraran pôc, di sigûr.
**O restìn nô, i furlans, che di Barcelone o podìn imparâ tant, se dome si convincìn che un popul unît al è plui fuart di ducj i manganei di chest mont. E che chei si puedin crevâ ancje inte urne.
✒ Dree Valcic