Ce isal restât des grandis celebrazions pai 40 agns dal Taramot fatis intal 2016?

Daspò de cjoche pes celebrazions dai 40 agns pal Taramot dal 1976, chest an la ondade di events e somee che si sedi un tic bonade. Un inovâl un tic plui cidin, ancje se simpri cetant sintût: forsit in stîl plui furlan. Fasìn il pont de “celebrazionone” dal an passat e de memorie dal Orcolat in gjenerâl cun Igor Londero. Igor al à scrit il libri Pa sopravivence, no pa l’anarchie su la esperience dal taramot tal borc di Gôt a Glemone, e al è stât autôr l’an passât di une biele Cuintristorie dal Taramot a pontadis sul nestri mensîl.
Igor, dopo dai 40 si torne al solit, forsit plui in scuare cul caratar dai furlans. Cuâl isal il stîl che a àn vût i furlans intal 1976? E ce isal restât?
Rispuindi a cheste domande al vûl dî indagâ il delicât teme da la autorapresentazion. Dut câs, ancje cence masse aprofondiments antropologjics, al salte fûr avonde che di une bande o cjalìn, e o mostrìn cun braùre ai forescj la interviste di Minà ae fantate taramotade che e dîs «Cosa serve piangere, qua bisogna ricostruire!» par mostrâ che o sin int dure come la piere, ma di chê altre si sintin ancje tancj discors sglonfs di retoriche e vantariis su lis virtûts dai furlans. Al è il cuintrisens di fâ cjacaris su cjacaris… sul fat che o sin int che e tâs e che e lavore!
La visite di Mattarella, il spetacul di Cristicchi a Glemone, lis memoriis sui gjornâi o tai video… Ce ti isal restât in positîf o negatîf des celebrazions dal 2016?
O crôt che ben planchin si sedi tacât a cjacarâ de int, e no dome dai politics. No dome su La Patrie dal Friûl si à dât spazi al teme da la autoorganizazion popolâr, ma ancje di altris bandis si è cjacarât di chest. O pensi par esempli ae biele idee de Diocesi di tornâ a publicâ Friuli, un popolo tra le macerie, che al reste une biele foto dal 1976. Fintremai Cristicchi, tal so spetacul a Glemone al à contât alc di chest moviment. Di altre bande, o pensi al libri di Bosari Fasìn di Bessôi?: si va indevant a dî che la int e jere dute stupide, continuant a ignorâ dut ce che al jere fûr de stanzie dai botons. Dopo e reste la cuistion de elaborazion dal corot pai muarts che, ancjemò un volte in contradizion cu la nestre autorapresentazion, e ven vivude une vore in public e cence masse scrupui. Cristicchi a Glemone al à pontât tant su la emotivitât dal public e al à otignût un slavin di lagrimis e batimans. No cjati strani che la int e vai ancjemò i siei muarts, ma se lu fâs in public al vûl dî, forsit, che si sta creant une identitât coletive fondade su di une tragjedie condividude, e chest spes te storie al à volût dî che a mancje la condivision di valôrs o ideâi.
Daûr de tô esperience, i zovins che no lis àn vivudis ce pensino di chês vicendis?
A san pôc, ma mi tachi tal discors di prin. Se o pontìn tant sul ricuart de tragjedie e sui muarts, al è normâl che i zovins (ma ancje, par dî, i gnûfs furlans) a sedin taiâts fûr. Za chei de mê gjenerazion (o soi dal ‘75) no puedin impensâsi dai muarts e di ce che al jere prin. Alore invezit di rabiâsi cui zovins che no scoltin, o varessin di resonâ sui valôrs e ideâi che o volìn insegnâur par un miôr divignî: la solidarietât e il tignî dongje ducj, il sens dal ben coletîf, il rispiet dal ambient, e ancje il sens dal dibati e scombati, la onestât e il coraç di jessi minorance. Fintremai il valôr de sconfite. Robis un grum fûr mode, che però a puedin, anzit, che a àn di interessâur ancje ai zovins e a chei vignûts di fûr.
Cualis sono stadis lis ocasions cjapadis e cualis chês pierdudis dal taramot?
Un tragjedie, tal sens classic di pierdite inelutabile, mi pâr che e à a ce fâ cul grant “savê fâ” che al è stât metût dongje tai nivei plui bas e nivei mediis da la aministrazion publiche. Mi riferìs al incredibil lavôr fat a so timp dai uficis tecnics regjonâi e comunâi par fâi cuintri a une masse straordenarie di lavôr de Ricostruzion, intun contest dulà che une semplice calcoladorie eletroniche e jere un ben râr, e dut al vignive fat a man. In assence di mieçs e di diretivis, chescj oms e feminis a àn fat miracui, improvisant e inventant metodologjiis, creant standard gnûfs dal nuie. La tragjedie e je che dut chest al è lât pierdût. Al aparten ae archeologjie. Chest par cuistions tecnichis, ma ancje parcè che tai agns no si à savût valorizâ dut chest, e fâ chel che vuê o clamìn l'”upgrade”. Par chel che al inten lis ocasions cjapadis bisugne ricuardâ la propulsion sociâl e culturâl, di riscuvierte des lidrîs, che e à puartât, par dî dome la robe plui sot i voi, a vê une Universitât a Udin.
Pe celebrazion dai 50, ce ti auguristu?
Mi auguri che lis celebrazions dal taramot a deventin une ocasion pai furlans di resonâ soredut su la proprie dimension coletive, sui valôrs e sui mûts di jessi e di fâ che a àn permetût ae nestre int di superâ chest dificil torment. Une ocasion par insegnâ ai zovins e a ducj chei che a vivin in Friûl cence vê vivût il taramot, di cognossi e di sintîsi part di une storie e di une comunitât. Une ocasion par cjatâ la fiducie te capacitât de int di fâi cuintri a ducj e a dut, e ricuardâ che la politiche vere no passe tai tinei di chei che a comandin o ator par l’internet, ma e passe pai centris sociâi che a fasin la diference tra un popul e un trop di individuis.
Trop duraraie ancjemò cheste memorie in mût cussì sintût?
Se la memorie e je dome chê de tragjedie e dai muarts, ancjemò vincj, vincjecinc agns, par cuistions anagrafichis. Ma e pues deventâ di plui. In fonts, fiestis tant che il 25 di Avrîl a son vivis parcè che i ideâi de Resistence a son passâts dai nonos ai nevôts, e il 6 di Mai al podarès deventâ il 25 di Avrîl dai furlans.
✒ Dree Venier