L’ex scuele di Salin di Paulâr dal Dicembar dal 2016 e deventade la cjase di produzion dai grissins. La idee e je nassude di Nicola Sollero che, pûr di restâ a lavorâ intal paîs indulà che al è nassût e indulà che al vîf cu la sô famee, al à metût in pîts cheste ativitât. Chest midiant ancje dal jutori de aministrazion comunâl che e à volût dâ fuarce a chest progjet, autorizant Nicola a vierzi e a meti a norme la struture da vecje scuele elementâr sierade di agns.
«Il progjet – al conte Nicola – al previôt la produzion dai grissin, che ca sù di nô e mancjave. Plan planin, o stoi tacant a fâ cognossi il prodot ator e al à avonde sucès: lu puartìn a Triest, a Udin, in diviers alimentârs e in diviers locâi di gastronomie de Cjargne. Il prodot al è dal dut artesanâl e dut fat a man. I grissins a son tirâts a man e di conseguence la tiradure e je limitade, o sin dome jo e la mê femine che o lavorìn, e plui di 30-35 kg in dì no podìn fâ (a son za tancj cussì!). In plui, cuant che chei altris fors no fasin il pan o vin dât, par fâ un servizi, la disponibilitât di furnîlu ai esercizis di Paulâr. O fasìn ancje fuiacis. Ciert nol è un business, ma e je une ativitât che nus fâs vivi. Lavorant 8 oris in dì, o rivi a puartâ a cjase un stipendi normâl. O produsìn 12 varietâts di grissins – dal tradizionâl friabil a chel cu lis nolis, cu la cevole, cu la cavoce… A vuê, o vin cirche 30 clients. O tignìn un grum ae presentazion dal prodot: indulà che lu puartìn o volìn che al vegni metût e presentât intune cierte maniere, ancje par valorizâ il grissin artesanâl. A Paulâr al ven vendût in doi, trê puescj; il gno prodot nol pues jessi presint te grande distribuzion par mancjance di capacitât produtive: jo e la mê femine o fasìn dut a man.»
Nicola cualchi an fa al lavorave intune aziende di Tumieç e al jere spes ator pal mont, ma di simpri cu la passion di deventâ une dì fornâr. Dopo, al à molât il lavôr e al à viert, dopo vê fat il garzonât, doi fors (prime a Vençon e dopo a Tumieç).
«No cambiarès la mê vite di cumò nancje par scherç! Mi contentarès ancje di une cartufule in dì pûr di rivâ a lâ indevant cu la ment serene! Cumò o vîf a 30 metris dal for. La comoditât e je grande! E la sodisfazion ancje, pal fat che o soi tal gno teritori. Jo achì o ai fat agns fa lis scuelis elementârs e cumò o ai metût a norme la struture, e o ai podût creâ il laboratori dai grissins! Al vûl un pôc di spirt e crodi in ce che si fâs. Tancj mi àn dit ‘tu sês mat’!
Cuant che o ziri ator pai nestris teritoris o cjatarès simpri alc ce fâ… O vin une miniere di aur in Cjargne e mi fâs dreçâ i cjavei il sôl pinsîr che o stin sentâts sui murets des placis a dî che nol nuie di fâ e a spietâ un lavôr… Come che une aministrazion mi à judât me, dal sigûr e pues judâ ancje cualchidun altri… Secont me a saressin tantis lis pussibilitâts di lavorâ achì. Al è vêr che no ti dan bêçs e che al tocje fâ sacrificis… Ma e vâl la pene!»
Al è cui che al va pal mont par lavorâ, cui che cu la crisi al à pierdût dut e cui che, come Nicola, al à puartât indevant un so progjet che i à permetût di vivi e di lavorâ tal so paîs insuazât des monts, cence grandis pretesis. E cussì a Salin, piçule frazion di Paulâr, al è nassût e al ven produsût il grissin friabil cjargnel!
✒ Marta Vezzi
