Events pe Fieste dal Friûl: il belanç

«Fedêl al pinsîr dal gno predecessôr, Alfredo Battisti, o dîs che la Glesie, come pûr lis istituzions civîls, a àn di operâ par mantignî vive intal popul furlan la cussience de proprie identitât. Un popul
al sparìs cuant che al piert la proprie anime che, intal câs dal Friûl, e je leade a strent cui valôrs
cristians». Chestis lis peraulis dal arcivescul di Udin Andrea Bruno Mazzocato, vie pe messe inte glesie parochiâl di Sante Margarite, fate pe Fieste de Patrie dal Friûl a Sapade/Plodn. Une Sapade dute imbandierade, cun tante int, plui di 30 sindics e un grum di aministradôrs locâi pe ricorence che e memoree la date dai 3 di Avrîl dal 1077.
Il moment di sigûr plui fuart al è stât la leture in lenghe todescje de bole dal Imperadôr Indrì IV, l’at di fondazion de Patrie dal Friûl, e po dopo e je tacade la cerimonie civîl.
Di bande sô, il sindic Manuel Piller Hoffer, saludant e dant il benvignût al à sostignût cemût che la sô comunitât e à dirit di jessi scoltade e di no viodi imberdeât il percors pal passaç de Regjon Venit al Friûl-Vignesie Julie che al dure di plui di 9 agns. E inevitabilmentri la cuistion Friûl-Venit e je tornade a scjaldâsi, cun cualchi mugugnade cuant che si è metût in lûs che nissun, di Zaia in jù, al à partecipât ae ricorence.
Di bande sô, il president de Provincie di Udin Pietro Fontanini al à domandât il rispiet de democrazie intal câs des spietis manifestadis a clâr dai sapadins.
Il president dal Consei regjonâl Franco Iacop, al à batût sul concet dal Friûl, regjon autonome fate di “comunitât di comunitâts”: «La vicende di Sapade/Plodn e de sô rivendicazion, che nus cjate solidaris, e à di insegnânus a tornâ protagoniscj de nestre storie». Fra Sapade e il Friûl «no esistin distancis, ma une sole identitât» al à declarât l’assessôr regjonâl ae culture Gianni Torrenti, intervignût in rapresentance de Zonte. Un concet rimarcât di Lorenzo Fabbro, president de ARLeF: «cun cheste celebrazion, il Friûl al va di là dai siei confins istituzionâi ma, soredut, di là dai confins mentâi, par promovi la cussience sociâl di un popul e des sôs tantis lenghis che a domandin di viodi rispietâts i lôr dirits».
Ae manifestazion al jere presint ancje cualchi conseîr regjonâl; i rapresentants de minorance slovene e dal Comitât referendari; Dree Valcic, il president de clape Patrie dal Friûl editore dal nestri gjornâl; Lorenzo Zanon, president dal Istitût Ladin Furlan Pre Checo Placerean; il president de Societât Filologjiche Furlane Federico Vicario, e Enrico Peterlunger, rapresentant de Universitât dal Friûl. Respirâ l’aiar dal Comelic à fat ben al Friûl e ai furlans; la sperance cumò e je che l’impegn testemoneât di dutis lis istituzions nol ledi al mancul, par continuâ a sburtâ par une Sapade/Plodn furlane.
___________________________________________
CHÊS ALTRIS MANIFESTAZIONS
Lis celebrazions de Fieste de Patrie dal Friûl a son ladis indevant fintremai ai 15 di Avrîl in graciis di un calendari siôr di plui di 100 events promovûts su dut il teritori furlan de bande di Comuns, ents e associazions. Come chês, un grum partecipadis, imaneadis de Assemblee de comunitât linguistiche furlane ator par dut il Friûl, cun tancj relatôrs che a àn partecipât in maniere volontarie: «Dutis lis comunitâts, ancje chês piçulis, a àn dirit ae autodeterminazion esercitade in maniere democratiche – al è stât il pinsîr di Diego Navarria, president de CliF -. Al devente alore necessari doprâ simpri miôr la autonomie regjonâl par valorizâ ce che di bon al è stât fat fin chi e par eliminâ ciertis ombris impuartantis che ancjemò a restin al orizont». Pes scuelis de infanzie, primariis e secondariis di prin grât dal Friûl invezit al è stât inmaneât il concors a premis Emozions furlanis in viaç pal teritori, promovût dal Ufici Scolastic Regjonâl. L’Istitût Ladin Furlan “Pre Checo Placereani”, al à invezit promovût il concors pe composizion dal imni uficiâl de Patrie dal Friûl; il vincidôr al sarà premiât in ocasion de prossime edizion, tal 2018.
✒ David Zanirato