Sfuei Mensîl Furlan Indipendent
Archivi de Patrie

(L)INT FURLANE. A Triest si frein de unitât regjonâl

............

Che il cûr de politiche taliane al bati fuart par Triest lu savìn di simpri.

**Dute la retoriche nazionaliste, l’iredentisim difondût a plenis mans intai libris di test, la canonizazion de citât elete a martare e di consecuence degne di jessi judade, supuartade ancje in maniere economiche in ogni ocasion di plui o mancul un secul, e rapresente une des carateristichis italichis.
**Mai però tant che intal ultin periodi si è podût assisti ae esaltazion dal so rûl in tiermins globâi: no esist manifestazion internazionâl là che nol vegni proponude tant che sede. Il puart al somee che al sedi deventât “vitâl” pai destins de nazion. Il stes Gentiloni lu à afermât dilunc de sô visite in Cine, descrivintlu tant che terminâl naturâl de Vie de sede dal tierç mileni.
**E jù milions di euros pal cjâf lûc, invistiments che no àn paragons in altris situazions.
Ma atenzion: nol sarès nuie di mâl, anzit al sarès positîf se a risultâ beneficiade di cheste mane dal cîl e fos dute la Regjon.
**Cuntun pôc di oportunisim san, che une fuarce politiche che si riclami al autonomisim e scuen, par fuarce, fâ i conts, o podaressin fintremai indalegrâsi.
O pensaressin di trops vantaçs di chest gjenar di disvilup che a podaressin gjoldi lis nestris industriis, trops sbocs competitîfs che si vierzaressin pai nestris cumierçs.
**Tancj condizionâi che a deventin ponts interogatîfs seris su lis efetivis risultancis positivis pal Friûl.
La concentrazion dal podê economic e politic intune situazion no à mai puartât al disvilup gjenerâl dal teritori, al sucêt invezit il contrari.
Par sô nature, un centri di chest gjenar al è simil a une mantide che, par mantignîsi in vite, e à di supâ energjiis, intun procès di autoriproduzion.
**Ancje la ipotesi di citât metropolitane, sostignude di dute la classe politiche triestine, e va inte stesse direzion. O scugnaressin forsit ancje nô riconsiderâ la poie dade a une ipotesi simile. Nô le viodìn tant che che une division logjiche e razionâl dai interès regjonâi, in rive al golf le pensin tant che la struture istituzionâl in stât di sostignî progjets a vantaç esclusîf di chê realtât specifiche.
**Il câs des vuardiis urbanis che a àn refudât il simbul de “acuile dal Friûl” tant che carateristiche de monture regjonâl de Polizie Locâl, par cjapânt il puest cu la alabarde, al podarès fâ ridi pe ignorance dimostrade inte definizion dal ornament (la acuile e jere chê regjonâl, ben diferente di chê furlane), ma al è preocupant invezit pe paronance che e ven refudade la idee di fâ part de  stesse Regjon, di sotstâ a regulis compagnis par ducj.
**In barbe a cui che ancjemò al fevele di “Fvj” cence tratut: chel, di fat, lu metin za i triestins.
✒ Dree Valcic

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +