On line il dizionari des vitis dai furlans. De cjarte stampade ae rêt, une risorse che e no finìs mai di slargjâsi

La nassite dal “Gnûf Liruti, il dizionari biografic dai furlans” e jere tacade intal 2006 cu la scree dal prin volum a stampe: 1. L’ete di mieç, a cure di Cesare Scalon. Il secont al jere jessût tal 2009: 2. L’etât Venite, a cure di Scalon, Claudio Griggio e Ugo Rozzo. Il tierç, simpri su cjarte, tal 2011: 3. L’etât contemporanie, curât di Scalon, Griggio e Giuseppe Bergamini. Trê grancj cjapitui su lis personalitâts de storie furlane in nûf volums in totâl.
Daspò dîs agns o pôc di plui dal inizi di cheste grande aventure editoriâl – ven a stâi la compilazion di un dizionari su la vite dai furlans plui ilustris de storie –, e je stade presentade in ocasion de fieste de Patrie dal Friûl 2017, la version online di cheste impuartante iniziative. Promotôr dal progjet, l’Istitût Pio Paschini pe storie de Glesie in Friûl, che al à rimodernât pal digjitâl cheste grande sorte di enciclopedie dai furlans, graciis al contribût de Provincie di Udin, de Fondazione Friuli e de Arcidiocesi di Udin.
2.620 vôs biografichis a disposizion di ducj, no dome pai studiôs e no dome intes bibliotechis. Cumò, di cjase o in cualsisei puest indulà che e je une rêt internet, baste vê un computer, o un tablet, o un smartphone,  ducj ai puedin cuntun clic documentâsi su la vite e su la opare dai furlans plui significatîfs de nestre storie. I contignûts par di plui a son a disposizion daûr une atente e moderne funzionalitât, miôr rispiet ae version a stampe.
Une leture ipertestuâl in plui che secuenziâl, come che al è pe cjarte. Insome, si pues consultâ il dizionari midiant di diviersis modalitâts di navigazion: par ordin alfabetic, par areis tematichis (storie, lenghe, siencis, arts, tecnologjie e vie indenant), par ricercjis avanzadis, specificant i criteris, cu la pussibilitât par esempli di inserî arcs temporâi, datis e lûcs di nassite e di muart, professions, altris clâfs di ricercje par svariadis variants di indagjin.
Nol è di trascurâ l’inzornament che al permet il dizionari online. Mendaduris di eventuâi erôrs, zonte di informazions, fotografiis e altris dâts di interès, tant che videos, regjistrazions audio, coments, bibliografiis, a puedin jessi inserîts cence masse fastidis intes schedis dai personaçs. Un insiorament cence fin, un procediment dal sigûr plui agjibil dai inzornaments de cjarte stampade. In plui, pal 2018 al è proviodût un suplement cun gnovis vôs, cun ricercjis e studis resints.
Sgarfant, o miôr, cricant sul “Dizionari bibliografic dai furlans”, tra lis doi mil e passe vôs, si scuvierzin cetantis bielis robis, utilis e impuartantis par tacâ a scuvierzi plui tal profont la anime dai furlans e des furlanis che a àn fate grande la nestre tiere. Par dâ juste une cerce, o ripuartìn in curt cualchi notizie de prime, de ultime e de vôs di mieç, ven a stâi: l’astonom Binetti Antonio, il predi e poete Zuttioni Giovanni e la fotografe, politiche, operarie, sartore e atore – cussì le nomee il dizionari a nivel di profession – Modotti Tina.
BINETTI ANTONIO (San Pieri di Gurize, ai 19 di Jugn dal 1846 – Arceti di Firenze, ai 20 di Fevrâr dal 1928). Osservadôr espert de posizion dai asteroits e des cometis, laureât te scuele di aplicazion par inzegnîrs de Universitât di Padue, al è stât membri de Academie dai Lincei e membri associât de Royal Astronomical Society di Londre. Plui voltis vincidôr di concors pe catedre ae Universitât di Turin e Firenze, al à lavorât pe gran part de sô vite intal Osservatori di Arcetri.
ZUTTIONI GIOVANNI (Vil-divar, ai 20 di Otubar dal 1837 – Vildivar, ai 12 di Lui dal 1901). Predi, cooperadôr a San Stiefin udinês, a Gridiscjute di Vildivar, capelan a San Martin di Codroip, plevan e vicjari forani di Vildivar. Di lui al dîs D’Aronco: “Di spirt cetant caritatevul, tant di murî puarissim, al veve di jessi un tipic esempli di predi di campagne ecelent, lavoradôr mai strac».
MODOTTI TINA (Udin, ai 16 di Avost dal 1896 – Citât dal Messic, ai 6 di Zenâr dal 1942). Emigrant di cuant che e veve doi agns, e à tacât biel zovine a lavorâ in filande. Intal 1913 e je a San Francisco intai Stâts Unîts cu la famee, lavoradore in sartorie. E tache chi la sô aventure di fotografe e atore. Los Angeles, Hollywood e Citât dal Messic a son tapis impuartantis de sô vite che le svicinin a grancj artiscj. Di chi, l’impegn politic, militante tal Partît comunist messican. Tornade in Europe dopo diviersis persecuzions, la ultime part de sô vite le à passade tra Mosche, Varsavie, Viene, Parîs, Madrid e altris citâts, ativiste convinte e artiste fin sul ultin. ❚
✒ Alessio Screm