Une Stele di furlanetât “Stele di Nadâl 2017” e je lade esauride

Une Stele di Nadâl cetant autonomiste. Le àn definide cussì la edizion 2017 dal innomenât strolic che La Vita Cattolica e burìs fûr di 69 agns. A son tancj i articui che a àn a ce fâ cu la storie e la culture dal Friûl. Par esempi la rubriche umoristiche A scote dêt di Gjelindo Titiliti ilustrade cui dissens dal nestri diretôr Dree Venier, o i articui saurîts (titolâts Lis fusetis) dal nestri president Dree Valcic. Si va indevant cuntune rubriche storiche curade di Agnul Floramo Une lidrîs diferente, cun Gianfranco Ellero che al piture lis figuris di 12 oms grancj che a àn contribuît a fâ sù la Universitât dal Friûl; podopo Serena Fogolini cui ricuarts di pre Zaneto e Dino Persello cuntune rubriche su manifestazions popolârs di chenti; Lis voris dal mês (di Alessio Potocco), Mangjâ di gust, une rubriche sportive, il ricuart dal annus horribilis 1917 cu la ocupazion Austroongjarese…
E tant, tant altri.
Cheste “linie” e à vût sucès, la edizion e je lade esauride: «O vin vût di spesseâ a ritirâ i numars restâts tes ediculis: no ‘nd vevin plui avonde pai abonâts» nus conte la responsabile Erika Adami, disvelantnus ancje che il Benandant che ogni an al faseve il “strolic” al jere pre Meni Zannier. Cungjò, pre Domeni, ma gnovis fuarcis si stan fasint indevant. ❚