La bataie par une gnove Regjon e i coments. Fontanini: «Un om di popul ancje se nobil»

Ai 7 di Dicembar, forsit te ultime ocasion publiche che si à vût di incuintrâlu, Marzi Strassolt al jere a manifestâ cun chei dai Comitâts pal referendum consultîf par dâi ae Regjon une organizazion cun dôs Provinciis, Friûl e Triest.
Su lis pagjinis dal setemanâl online di Identitât e inovazion, la socie che al à metût in pins, Strassolt al à motivât in plui ocasions il parcè di cheste sielte e, seont lui, di cheste necessitât.
In cheste ete al viodeve doi grancj impegns che i saressin tocjâts a un moviment autonomistic: «Il prin, garantî la tutele de autonomie speciâl concedude ae nestre regjon e a altris cuatri», une autonomie che e cor «pericui grâfs». Il secont, chel «di garantî plene autonomie ae comunitât furlane che e à di liberâsi dai condizionaments di chê risultive di snaturalizazion de sô identitât costituide de citât di Triest».
La bataie pes dôs provinciis autonomis dal Friûl e di Triest e jere «un element strategjic pe identitât e pal svilup de comunitât furlane». Te vision di Identitât e Inovazion, che Strassolt al jere il so president, «cinc cuistions di fonde a podaressin cjatâ soluzion se il centri di decision politic aministratîf al fos puartât in Friûl». Chestis cuistions a rivuardin «la lenghe, la Universitât dal Friûl, la politiche economiche, il svilup de mont e des minorancis linguistichis». Cantins che no son tai interès e tes atenzions di Triest, che al à simpri frenât esigjencis tant lontanis de sô culture e de sô economie.
Inte vision di Strassolt «la separazion dal Friûl di Triest e puartarès grandis oportunitâts par dutis dôs lis realtâts». No une operazion cuintri, ma a pro «di doi teritoris che a puedin cussì liberâ tantis energjiis, cence plui condizionaments l’un su chel altri».
Ae coerence ideâl di Strassolt i à rindût merit ancje la presidente de Regjon, Debora Serracchiani. «Ancje se no ai mai condividude la sô vision di une Regjon dividude in dôs Provinciis, o vuei ricognossi la coerence e la costance che al à vût tal puartâ indevant la sô bataie».
«Al è stât un om di popul ancje se al jere nobil», al à considerât il president de Provincie di Udin Pieri Fontanin. «Un om coerent – al à zontât – che al à simpri lotât pe incressite dal Friûl, par difindilu e par valorizâlu tai confronts di Triest». ❚ ✒A.L.