(L)INT FURLANE. O fasarìn come che simpri o vin fat

✽✽ Un sens di aviliment al jemple chescj prins mês dal an gnûf: la pierdite di Marzi di Strassolt, di Albert di Cjaurià, di pre Meni Zannier e – prime ancjemò – di Renzo Balzan no nus lassin indiferents.
✽✽ Mai il mont autonomist al veve cognossude une pierdite compagne in cussì pôc timp.
✽✽ Nol pues no colpî il fat che esponents di spic dal pinsîr furlanist no sedin plui a dâ il lôr contribût di passion e di inteligjence ae nestre cause. Ciert che si pues ancje no vê condividudis ciertis posizions o sieltis, e reste purpûr la sigurece che ognidun di lôr al à puartât indenant, cence dubis o esitazions, la bataie pal nestri popul, vint tant che finalitât di ogni lôr agjî, il ben di chestis tieris.
✽✽ Propit par chest, par dâ plen significât a cetant che a àn fat in vite e a cetant che di lôr al restarà inte memorie, midiant dai scrits, dai intervents, des oparis leterariis, o calcoli che al sedi di combati cun ogni fuarce un concet che al stralûs di cualchi intervent vignût fûr a coment de lôr muart. Chescj resonaments, a ben che sclets, a sunin tant che une litanie avilide di sperance sconfuartade e pierdude: «Cemût fasarìno cence di lôr».
✽✽ La rispueste e à di jessi luminose e ferme: o fasarìn come che simpri o vin fat. O larìn indenant cun gnûfs oms e feminis che a racueiaran la ereditât. Anzit, che le àn racuelte za. Isal forsit finît il rûl di Glesie Furlane cu la muart di pre Checo Placerean? No. Dopo di lui, pre Toni Beline e dopo ancjemò chei altris predis che a àn continuade la opare. Il moviment autonomist si isal vadì “suicidât” pal dolôr cuant che Fausto Schiavi al è muart? Ancje ca, la rispueste e je negative.  La storie stesse di chest gjornâl e je la dimostrazion palpabile che dal 1946 «La lum no si è mai distudade» cemût che, in maniere insiemi razionâl e profetiche, al scriveve il so fondadôr Felix Marchi.
✽✽ Vaîsi intor e je salacor une des piês carateristichis che intai agns a àn acompagnât i furlaniscj, difondint un sintiment che in maniere paradossâl al è la negazion stesse dal spirt furlan.
A chest “sintî” a àn ciert contribuît tancj faliments, massime politics. La mancjance di un partît di racuelte nazionâl e pese su la nestre storie resinte, come che a son clapons lis rispuestis dispès masse debilis che o vin dât aes prevaricazions statalistis, aes indecencis dai partîts talians e dai lôr “Jude” locâi.
✽✽ Nuie no nus vignarà regalât. Visìnsal simpri, e se o volìn dâ un sens ae vite di chei che nus àn lassât, no stin a fâsi cjapâ di aviliments e di pessimisim. Cjalìn invezit chês fuarcis gnovis, chei zovins che – traviers mil dificoltâts – vuê a àn ripiât e a continuin une bataie lungje e antighe.
✽✽ E o volarès sierâ cuasi cuntune provocazion: cetancj furlans di là di Balzan, di Strassolt, di Cjaurià, di Zannier, sono muarts intai stes dîs e cuissà trops di lôr che a àn vût intai cûrs, intal cjâf i stes ideâi.
✽✽ E a son chescj “anonims” i vêrs protagoniscj de storie. A son il popul. ❚
✒ Dree Valcic