La storie dal Premi

Pal San Simon a son passâts pardabon i plui grancj nons de narative furlane dal ultin toc dal Nûfcent e de prime part dal gnûf milenari: e za cjalant cui che dal 1980 incà al à vinçût il preseât ricognossiment, o capìn subit parcè che chest concors al è considerât il plui impuartant premi leterari pai scrits in marilenghe. Intai 37 agns de sô storie la vitorie e je lade a oms come il poete Amedeo Giacomini, Alan Brusini, Franca Mainardis, Renzo Balzan, Checo Tam, Mario Turello, Sandri Di Sualt, Dani Pagnucco, Luca De Clara, Pierluigi Visintin, Raffaele Serafini e Adriano Nascimbeni, dome par citâ cualchidun dai tancj che a àn fat la storie di chest Premi che nol fâs diferencis di teritori: lu àn vint plui voltis autôrs di là da l’aghe come Ovidio Colùs, Giacomo Vit e Alberto Luchini. Il president de Jurie, Carlo Tolazzi, a à vint dôs voltis, come i za citâts Colùs e Luchini, pre Toni Beline, Gianni Gregoricchio, Roberto Ongaro e Tarcisio Mizzau: ma il record al è chel di Franco Marchetta, che al à vint trê voltis (1997, 2011, 2012). Cinc voltis il premi nol è stât assegnât: la Jurie no je tant di bocje buine, ma chest al è ancjemò di plui garanzie di cualitât . ❚ (W. Tom.)