La Provincie e lis scuelis. Fontanini: «Inconcepibil che il patrimoni di cognossincis e esperiencis al vegni dismantelât»

Restyling pes palestris dal Marinelli, fnît di regolâ il cuviert al Ceconi, concludude la realizazion dai passaçs in sigurece dal gnûf terminal pai students di vie de Faula al centri studis di vie Leonardo Da Vinci, cuasi finîts i adeguaments de aule magne al Copernico. Aprofitant dal Istât, la Provincie di Udin e à dât sburt a une serie di intervents intes sedis scolastichis di Udin e dal teritori provinciâl (al Linussio di Codroip ma ancje al Marchetti di Glemone) che i permetaran ai students di vê dai spazis rinovâts e ancje gnûfs furniments intal an scolastic 2016-17.
Un impegn bande lis scuelis che l’Ent al larà indevant a mantignî coordenant la manutenzion ordenarie ma ancje lis fasis di cualchi lavôr consistent di manutenzion straordenarie intal istitût Ceconi, Zanon, Deganutti, Uccellis. Intervents che a laran indevant cun modalitâts operativis za concuardadis cui dirigjents scolastics par limitâ al minim i problemis pes scuelis. Di plui di 4 milions di euros l’impegn economic complessîf par chel che al rivuarde la capitâl furlane. “Lis scuelis superiôrs a son ‘osservadis speciâls’ de bande de Provincie di Udin – a confermin i esponents de Zonte provinciâl –. L’impegn dal Ent al è simpri stât massim par dâ ai nestris fantats aulis, laboratoris e locâi adats ae ativitât didatiche. Ogni an, cun di plui, si interessìn di definî il plan de ufierte formative metint gnûfs cors/articolazions ancje in funzion dai potenziâi disvilups de economie locâl. Ducj compits che lis nestris struturis a fasin cun responsabilitât e atenzion stant che pensâts a sostignî e fâ cressi l’avignî de nestre comunitât.”. Impegns che la Provincie e scugnarà molâ cun la sô sieradure proviodude de riforme dai Ents locâi.
E propit in riferiment al futûr coordenament des scuelis superiôrs, il president Fontanini al rimarche cemût che al sedi “inconcepibil che dut il nestri patrimoni di cognossincis e esperiencis al vegni dismantelât cul passaç aes 10 Uti dal nestri teritori. La Provincie e domande che la competence e resti in cjâf al Ent ancjemò par un an e mieç almancul, fin ae fin dal mandât aministratîf”. ❚
✒ Redazion