Sfuei Mensîl Furlan Indipendent
Archivi de Patrie

Premi Sant Simon

............

Ai 28 di Otubar a Codroip al vignarà disvelât il non di cui che al à vinçût il Premi Sant Simon, il plui preseât ricognossiment leterari pe narative furlane in marilenghe. Fin dal 1980 chest al è il moment plui impuartant pe nestre comunitât di scritôrs, ancje parcè che il criteri di judizi che e dopre cheste jurie al è pardabon sevêr: in passât par cinc voltis nol è stât assegnât, parcè che la cualitât dai scrits no je stade stimade avonde buine. La leterature no je brût di verzis, insome, e i scritôrs lu san: par chest il concors in prose par furlan nol atire mai cetancj autôrs, ma dome une piçule platee di selezionadis firmis. E propit parcè che se si sa che tantis polemichis a son daur a saltâ fûr ogni volte che la jurie e fâs un pestefruce des ambizions di tancj di lôr, chest Premi al è il vêr banc di prove par un che al à voie di scrivi in marilenghe e no dome cjalantsi l’umbriçon, ma confrontantsi cu lis liniis plui inovativis di une narative taliane e europeane continuementri in evoluzion. Chest al jere il spirt di Franco Marchetta, che purtrop nus à lassât masse adore, ma che al reste chel che al à vinçût il Premi Sant Simon par plui voltis (1997, 2011 e 2012). E chest al à di jessi il sproc par ducj chei che a vuelin proponi par furlan storiis che a jevin interès e a tegnin vive la lenghe come imprest di espression creative.
Daûr di une intuizion di Marchetta, il Sant Simon za di doi agns al à cambiade piel: no si limite a dâ fûr il Premi, ma si propon cun plusôrs apontaments sul teritori par sparniçâ ator pal Friûl lis pagjinis plui bielis dai libris segnalâts cun seradis di leture clamadis Mi ven di reading. In plui, al rint omaç a grancj nons dal pantheon leterari furlan (sabide ai 22 di Otubar a saran presentadis di Gianmario Villalta lis Agris Rimis di Amedeo Giacomini) e al anticipe une setemane prin di Sant Simon ducj i libris dai “finaliscj” che a scombatin pe vitorie finâl. Chest an l’interessante iniziative, che si clame SPIETANT IL Sant Simon, si fasarà joibe ai 20 di Otubar. Alì la jurie dal Premi e disvelarà i titui che a son stâts segnalâts: fra chei salacor al sarà ancje chel dal vincidôr.
Par chê sere, miôr no cjapâsi altris impegns: doi membris de jurie, il president Carlo Tolazzi e il gjornalist Walter Tomada, a metaran i finaliscj sot tal turcli par striçâ fûr di ognidun di lôr i segrets dai lôr romançs, lis motivazions che ju àn sburtâts a scrivi par furlan e a sielzi i argoments des lôr storiis. Che, bisugne dîlu, chest an a son pardabon diferents e intrigôs, e a finissin par frontâ une miniere di argoments. Si va di une galarie di personaçs storics che a deventin protagoniscj di contis misteriosis, ae storie di un puestìn che al reste cjapât dentri in dutis dôs lis Vueris Mondiâls, contade di une polifonie di vôs de sô famee. E no je finide culì: un romanç penç e incuietant al conte ancje de storie (vere) di trê fantatis tal cjamp di stermini di Bergen-Belsen; un “noir” al è ambientât tal mont dal spetacul, in particolâr sui palcs de danze classiche: e al è ancje spazi par un libri “On the Road” di un Kerouac furlan dut di lei e di no dismenteâ; e al è spazi ancje par une conte sui desaparecidos argjentins. Pocjis chest an a scrivin storiis ambientadis in Friûl, par esempi une suntun predi che nol rive masse a tignî dûr il so vôt di celibât: ma la tindince, al è clâr, e je un’altre. Il furlan si spant ator pal mont e no si strenç plui dome intor de Patrie, ma al cir di contâ storiis dal mont globâl cuntun sproc origjinâl. Lu veve za sclarît l’an passât Raffaele Serafini cul so Soreli jevât a mont che al veve striât la jurie cui siei riferiments al lontan Japon: ma chest an al è ancjemò plui evident il spirt “glocâl” dai gnûfs scritôrs in marilenghe.
I vot scritôrs che a an inviât i lôr romançs a scuvierzaran dome in chê sere cual che al sarà il destin de lôr fadie leterarie. Ma la grande novitât e je che di chest an no son di bessoi! In cheste edizion, difat, il Sant Simon al à viert ancje une sezion pai fumuts, cu la intenzion di slargjâ ancje jenfri dai zovins (che a doprin une vore chest lengaç sedi par esprimisi che par intratigniment) l’interès e la curiositât pal Premi. Ancje par chest inte jurie al è jentrât un espert di fumuts come Paolo Cossi. Cheste gnove pussibilitât no je stade avonde publicizade, si viôt, parcè che i lavôrs rivâts ae jurie a son dome doi. Dut câs al è dome l’inizi, e cjalant ae cualitât des creazions al vâl la pene di insisti: e la gnove vene narative furlane salacor si podarà lei ancjemò miôr cul jutori dai fumuts… ❚
✒ Redazion

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +