RICETE. Parmesane “disorganiche”

Timp pe preparazion: il timp di cuei su le gridele lis melanzanis, di scjaldâ la salse (o di parecjâle, se no le vês pronte) e completâ il plat
Ingredients par cuatri personis
2 o 3 melanzanis taiadis a rondelis, un vâs di salse di pomodoro e basili (miôr se fate in cjase), 1 o 2 mozarelis, un toc di parmesan o grane in scais (par taiâlu in scais finis al va benon il spele patatis)
SI FASIN CUSSÌ
Un dai plats plui carateristics de cusine taliane in Istât e je le parmesane di melanzanis. A pat di lâ li di un ristorant, o di vê une mari, une none o un mat fanatic dai fornei che al vedi voie, tal cjaldon, di metisi par un pâr di oris a fridi lis melanzanis e po dopo a stâ plui di mieze ore denant un for impiât (une cumbinazion no cussì facile tal mês di Avost…).
Beh, vêso mai pensât a une version plui frescje, e tant plui svelte par interpretâ chest baluart de italianitât in taule, semplicementri “discomponint” i ingredients e metintju ju artistichementri tal plat, intune cumbinazion di savôrs e colôrs, ma ancje di cjalt e frêt e di un tic di gracie tal presentâju?
Provait a pensâ…. un biel plat cun ator ator une curnîs di melanzanis a le gridele, cuntun fîl di vueli di ulive e scais di grane, e tal centri dal plat un biel coput di salse di pomodoro cjalde, cun parsore une buine mozarele frede a daduts (e insom une fueute di basili).
Dut ce che al conventarès par une parmesane. Ma cuntun snait moderni, ancje un grum plui frescje e lizere, e cence sclopâ di cjalt in cusine. Provâ par crodi…
Margherita Meggy Timeus