Il boom des coltivazions biologjichis: il pont | I numars dal Bio in Friûl-VJ

E crès la agriculture biologjiche in Friûl. I ultins dâts pandûts li dal Salon dal Biologjic e dal Naturâl di Bologne, secont lis elaborazion dal Sinab, il Sisteme di informazion nazionâl su l’agriculture biologjiche a disin che in Regjon, la superficie agricule unitarie doprade cun chescj metodis di coltivazion e je lade su, al 31 Dicembar 2015 e rispiet al an prime, dal 40%. Un salt dai 3.500 etars di fin 2014 ai 5mil a pene censîts. Il dât talian al regjistre une cressite invezit dal +7,5%. «Numars che nus dan reson, dopo agnorums di “stagnazion”» e comente Cristina Micheloni, president de Associazion taliane agricultôrs biologjics, Aprobio Fvg «Cun di plui tal 2016 la tindince si è mantignude, duncje si spietìn pe fin dal 2016, ancjemò une cressite. Al è, cun di plui, interessant spiâ un altri numar. Cheste corse al bio no je dome sburtade dai jutoris de Regjon in gracie al Plan di svilup rurâl, ma di un +11%, ven a stâ la richieste che e ven dal marcjât di chescj prodots. Sicheduncje la int e vûl e e cîr simpri di plui chescj prodots».
––
Ce si coltial? «In chest aument dal teren doprât pal biologjic a son cressudis soredut lis aziendis dal setôr vitivinicul, coltivadôrs di ue e cualchidun ancje trasformadôr in vin, e po lis aziendis di semencis» nus sclarìs Severino Del Giudice, membri dal diretîf de Aiab-Aprobio Fvg. In chest ultin setôr o cjatìn: soie, blave, vuardi, forment e gjirasol. «Il prin setôr al è za une presince storiche sul nestri teritori. Dongje de fruticulture, cun plantis di kiwi e miluçârs e, soredut tai ultins timps, ancje di pierçolârs. E de orticulture, con lis plantis tradizionâls; tra lis altris: salatis e lidric, cauliflôr, capûs», al zonte Del Giudice.
––
Dulà si coltial? La agriculture biologjiche – al è ben sclarî – a no dopre nuie de “chimiche di sintesi”, chê – par intindisi – di laboratori che e met adun plui elements o sostancis: no diserbants o jerbecidis tal coltâ, no colorants tes produzions o trasformazions di prodot, ni tai arlevaments. E naturalmentri par fâle si scuen jessi preparâts: no si inventisi agricultôrs biologjics bot e sclop cence vê studiât cemût che si prodûs in chest mût. Il boom sui etars doprâts par chestis particolârs produzions al regjistre parimenti une cressite ancje dai operadôrs dal biologjic. Prime dal boom, ai erin cirche 300, cumò a son sù par ju 370. «I jutoris rivâts dal Plan di svilup rurâl a àn sburtât cheste imprenditorialitât agricule gnove – al dîs Del Giudice – sparniçant a magle di leopart la presince di chestis aziendis bio in dute la regjon, cun tune concentrazion particolâr su Pordenon, Udine e Gurize, duncje in Friûl. La zone dulà che, rispiet al passât, e si ‘ndi son viodudis di mancul e je chê dal Medi Friûl; in tantis invezit si son logadis te Basse».
––
Ma la soie e rive de Cine Lis informazions che a rivin da import e export a nivel talian a puedin rapresentâ une oportunitât par i produtôrs bio furlans. Tal 2015, in Italie o vin impuartât de Cine 5mil toneladis di soie bio e 9mil toneladis di panei (farinis e scais di cereâi, che po a vegnin sdrumâts) doprâts tant che mangjims. «La riflession e je che forsit o podaressin rivâ a intervignî noaltris e a produsi nô, almancul a nivel di Nordest, dulà che esistin lis competencis e lis cundizions climatichis justis, invezit che impuartâ dal forest. Cheste dipendence de zootecnie bio de soie che e rive da soreli jevât al è un paradòs che prin o dopo si scuen frontâ» e spieghe Cristina Micheloni, president de Associazion taliane agricultôrs biologjics – Aprobio Fvg.
––
E il doman? Si fevele simpri di agriculture biologjiche cence chimiche “di sintesi”. Ae Associazion taliane agricultôrs biologjics – Aprobio Fvg si son sperimentâts gnûfs percors di tecnichis di coltivazion e di cumbinazion dai metodis bio cun chei tradizionâi e plui pandûts te culture dal puest. «La nestre associazion e je dentri de iniziative Soia Danubiana e Europe Soya, par vie che o vin a cûr la culture des proteinis vegjetâls e par chest o vin ancje inviât une rêt di contats e di rapuarts a livel talian e european», e siere la president Micheloni. ❚
✒ Oscar Puntel
_________________________________
I numars dal Bio in Friûl-VJ
Il Friûl-VJ e je stade la regjon taliane dulà che e je plui cressude, in tun an, la cuantitât di teren agricul dulà che si colte in mût biologjic: +39,1%, dal 2014 al 2015, secont lis statistichis dal Sinab, il Sisteme di informazion nazionâl su l’agriculture biologjiche. In tal stes arc di timp, i operadôrs dal biologjic a son cressûts dal 21,1%: in chest câs, al secont puest, daûr de Umbrie. La medie taliane di chescj doi dâts e je stade invezit: +7,5% e + 8,2%. In F-VJ, lis aziendis biologjichis a rapresentin il 2% di chês agriculis regjonâls tal lôr totâl. La incidence de superficie coltade in mût biologjic su chê agricule in gjenerâl e je dal 2,1%, stant ai dâts Sinab e a chei dal Istat. ❚ ✒ O.P.