FRIÛL EUROPE. “Brexit”, inglês isolazioniscj e scozês europeiscj

Une gnove conferme de mancjance – e de dibisugne – di une vere Union europeane. Chê de vitorie tal referendum dai 23 di Jugn (cul 51,8% cuintri dal 48,2% dai vôts) di chei a pro de jessude dal Ream Unît de UE no je une biele gnove, ni pe Europe ni par Londre, ma si pues calcolâle tant che une ocasion di clarece e une oportunitât par meti in vore un vêr cambiament.
Cun di fat, dal sucès dal isolazionisim britanic a trazion inglese al salte fûr un altri viaç che la Union europeane che o vin cumò e je masse intergovernative, masse economiciste e masse burocratiche e par chel e je masse scjarse – a ‘nd è masse pocje Europe – e propit par vie di chescj stes limits e ven percepide – e soredut e ven contade di un cierte retoriche nostalgjiche e nazionaliste – tant che «masse invadente».
Il paradòs al è che cheste situazion si à palesade cussì a fuart propit tal ream unît, che la sô posizion, prime dentri des Comunitâts europeanis e dal 1992 incà dentri de Union, e je simpri stade anfibie e ambigue e che e jere daûr a devantâlu ancjemò di plui propit su la fonde des gnovis concessions permetudis al guvier britanic cul acuardi fat tra Bruxelles e Londre pôcs mês indaûr.
Chel pat, metût adun cun chê di judâ il premier Cameron a indreçâ l’eletorât par che al vincès il “remain”, nol à jonzût chel risultât e anzit cumò, se la UE no si da une regolade, al devente un precedent, ancjemò plui pericolôs dal stes risultât dal referendum, a conferme che il “Brexit” nol è un probleme in se – cundut dal scjas che al è stât, tes borsis e tai media – ma dome pal “efiet domino”, stant che al mostre che te (dis)Union intergovernative di cumò si pues lâ dilunc a zuiâ di braç di fier e a fruçonâ sù dut.
Tes relazions tra il ream unît e la ue, che a vignaran definidis dentri di doi agns, no saran masse cambiaments. Magari cussì no, e sarà plui grivie la situazion dai citadins europeans imigrâts, ma cui che al pierdarà di plui e je la economie britaniche e cun chê i sudits de reine Lisebete, massime chei tancj di lôr che a àn votât a pro dal “leave”, lant daûr de demagogjie nazionaliste dal UKIP o tant che reazion cuintri des politichis antisociâls metudis in vore tai ultins agns daûr des indicazions de cussì clamade «Europe a vuide todescje», ma in realtât inviadis ancjemò de Thatcher e puartadis indenant dal “NewLabour”.
Il risultât dal referendum britanic plui che une sconfite pe Europe e pe prospetive di integrazion e di unitât e je une sconfite, a Londre e inaltrò, par chel europeisim istituzionâl, afarist e nazionalist, che tra l’atri dome doi agns indaûr al sbeleave i indipendentiscj scozês tant che «localiscj», in cuintriposizion cuntun presumût «cosmopolitisim» anglobritanic. E impen al è propit in Scozie che il “remain” al à cjapât, dapardut, lis percentuâls plui altis (plui dal 60%).
Intant che il Gales e soredut la Cornualie a son restâts cjapâts dentri dal isolazionisim inglês, il risultât scozês e chel de Irlande dal Nord (“remain” ator dal 55%) a deventin la ocasion par rilançâ il percors di autodeterminazion: di une bande viers di une Scozie indipendente; di chê altre in direzion de unificazion de Irlande; in ducj doi i câs inte suaze de Europe. ❚
Marco Stolfo