Sfuei Mensîl Furlan Indipendent
Archivi de Patrie

SLOVENIE. Si fasin i 25 agns de indipendence: i numars di un gnûf Stât

............

A son passâts vincjecinc agns dai 25 di Jugn dal 1991, zornade li che la assemblee slovene e à aprovât la leç costituzionâl pe atuazion dal At fondamentâl su la indipendence e su la sovranitât de Republiche di Slovenie e la Declarazion di indipendence. La dì dopo, in Place de Rivoluzion a Lubiane, il president Milan Kučan al à proclamât uficialmentri la indipendence slovene. A nivel internazionâl, il prin ricognossiment al è rivât de Cravuazie (che si è declarade indipendente tant che la Slovenie ai 25 di Jugn dal 1991) ai 26 di Jugn. Intai mês dopo, a son ladis daûr dal so esempli la Lituanie, la Gjeorgjie, la Letonie, la Estonie, la Ucraine e la Bielorussie. Te Europe ocidentâl, la prime a ricognossi la Slovenie e je stade la Islande. A metât Zenâr dal 1992, la Slovenie e je stade ricognossude da paîs de Comunitât europeane, tra chê la Italie che e à instaurât ai 17 di Zenâr i prins rapuarts diplomatics cul gnûf paîs vicinant. La Slovenie e je deventade dopo membri de Union europeane il prin di Mai dal 2004, intant che dal 2007 e fâs part de eurozone e dai 21 di Dicembar dal 2007 ancje de aree Schengen.
In chescj vincjecinc agns la Slovenie e à vivût periodis di cressite economiche fuarte, ma e à patît ancje jê i efiets de crisi globâl, paiant lis consecuencis de crisi finanziarie. Dopo cualchi an di recession, il Pil al è tornât a cressi e il tas di disocupazion a lâ jù. Al somee duncje che il periodi plui critic al sedi stât passât in maniere definitive, ancje se il guvier di Miro Cerar al reste prudent e pront a adotâ altris riformis struturâls par garantî la stabilitât des financis publichis.
Dut câs, de indipendence il prodot interni sporc (Pil, ndr) sloven al è cressût a nivel reâl dal 75%. Intal 2015 al à rivât al nivel record di 38.543.200.000 euros, ma in tiermins di Pil pro capite al valôr massim si è rivâts prime dal principi de crisi, intal 2008. In chest procès, la esportazion e je stade un dai fatôrs principâi de cressite economiche, e e va indenant a jessilu ore presint. I prodots plui espuartâts a son stâts i veicui, i prodots medisinâi e farmaceutics e i machinaris e aparecjaduris eletrics.
la maiorance de popolazion però e stime che lis cundizions di vite in slovenie a fossin miôr prime dal 1991, stant ai dâts di un scandai resint fat pal cuotidian Delo in ocasion dal XXV aniversari de indipendence. Dome il 15% dai intervistâts al à declarât di vivi miôr. Cundut di cheste valutazion pal plui negative, il 60% dal campion al à dit di jessi cetant braurôs de Slovenie. Tra lis personalitâts politichis che a vegnin colegadis cu la indipendence, al prin puest si cjate il prin president Milan Kučan, cun daûr Jože Pučnik, president de coalizion Demos (Oposizion democratiche de Slovenie) che e à vinçudis lis primis elezions democratichis che si son tignudis in Slovenie intal 1990 e duncje al à formât il prin guvier. Al tierç pont o cjatìn il prin president de assemblee France Bučar, intant che il leader de oposizion di cumò, Janez Janša, ministri de difese intal prin guvier sloven, al è al cuart puest. Al cuint puest, su la base des rispuestis dadis dai intervistâts, al è il prin prin ministri sloven Lojze Peterle.
De indipendence a son stâts cuatri i presidents de Republiche (Milan Kučan, Janez Drnovšek, Danilo Türk e Borut Pahor), intant che i guviers a son stâts ben dodis. Cundut di tantis crisis di guvier, lis mudis e rimpascj, lis primis elezions anticipadis a son stadis dome intal 2014. De declarazion di indipendence, a son stâts vot i prins ministris slovens, tra chei une sole femine, Alenka Bratušek (chei altris a son stâts, di là di Peterle, Janez Drnovšek, Andrej Bajuk, Anton Rop, Janez Janša, Borut Pahor e Miro Cerar). Tra i singui partîts, chel che al è restât plui dilunc e cence interuzion intes diviersis coalizions di guvier, al è stât il partît dai pensionâts DeSUS (dai 30 di Novembar dal 2000, ma al faseve part ancje dal cuart guvier in cjarie tra i 27 di Fevrâr dal 1997 e i 7 di Jugn dal 2000). ❚
Tjaša Gruden

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +